LAWAS: Bantu nengah program Bantu Barang Diguna Pemun Sarawak (SKAS) diberi berenggat nentuka penerima ngena chara nemban agi sereta enda masau belanja tekala nya.
Sapit Premier Sarawak, Datuk Amar Awang Tengah Ali Hasan madah, chara nya mantu rayat ngatur belanja besehari-sehari enggau meruan agi, lalu ngelempungka belanja sida.
Ku iya, chara berenggat nya mega ngasuh bantu bisi belama dikena bala penerima.
Pengawwa Ngelanchar Program SKAS Renggat DUN Bukit Sari udah diatur di Hotel Seri Malaysia Lawas kena Hari Satu, digulu bala tuai komuniti, tuai raban bansa enggau pengari mayuh agensi sereta komuniti menua.
Kaban Kunsil Nengeri (ADUN) Bukit Sari nya mega ngansak tuai komuniti, tuai raban bansa enggau gerempung ukai dikuasa perintah (NGO) regas bejalaika pangku pengawa meri penerang pasal program nya ngambi sida ti patut nerima enda dikemelu.
Iya nyemetak madah, agensi perintah mega patut chakah agi meri penerang nentuka bantu datai ba semua raban diselinting.
Di Pelilih Lawas, sepenyampau 15,047 penerima nerima pemaik ari program nya ngaul 6,652 ruang bilik, 1,795 orang tuai enggau 6,600 orang bujang.-EDISI UKAS
