155 Lot Entepan Entukar Tambah Ba Begunan Forum, Ngemuntang Akses Mensia Mayuh.
MIRI: Entepan entukar ba Begunan FORUM diatu ditambah nengah pengawa ngaga entepan entukar baru.
Sapit Menteri ba Opis Premier Sarawak (Pengereja Kasar, Imigresyen enggau Patau Projek) ti mega Kaban Kunsil Nengeri (ADUN) Mulu, Datuk Gerawat Gala madah, projek nya beungkus RM966,896.60.
Ku iya, projek nya udah diserah ngagai kontraktor kena 11 Julai 2025 lalu tembu digaga kena 3 Oktober 2025.
“Asil pejalai projek nya, bisi 155 lot entepan entukar tambah mujur disedia ngujungka lot entepan ba Begunan FORUM nambah ngagai 410 lot dibanding 255 lot sebedau tu,” ku iya ba pengawa nya, Hari Dua.
Iya mega nyemetak madah ke pengawa ngaga entepan entukar nya siti inisiatif beguna nyamin pengelantang sereta perengkaguna ngagai mensia mayuh kelebih agi bala pengusung enggau penyuwa begunan nya.
Ku iya, pengawa nyendia entepan entukar ti berurun enggau chukup ukai semina ulih mutar penanggul sekut tang mega nyaup ngelanchar pejalai trafik dia.
“Projek nya mandangka komitmen perintah negap infrastruktur mensia mayuh ti berurun, likun enggau ngelantang penguna nipak guna pemansang mengeri ti deras mansang,” terang iya. - EDISI UKAS
