KUCHING: Pengerichah ngerami Hari Raya Aidilfitri patut nyadi peluang ngerapitka kaul begulai, narak pengasih enggau negap pengelantang ba rayat pupu bansa di nengeri tu.

Sapit Premier Sarawak, Datuk Amar Awang Tengah Ali Hasan madah, Aidilfitri ukai semina hari besai ungkup berami aja, tang nyadi pengawa ti chukup besai reti meri terima kasih enggau bala ngampunka penyalah pangan diri.

Ku iya, ba hari besai penuh pengaga nya, rayat mega dipinta belemati ke pemesai guna ulah bebatak asur, bebasa enggau segulai sejalai ba pengidup.

“Di Sarawak, kitai idup ba komuniti pupu bansa ti datai ari mayuh raban bansa, pengarap enggau budaya. Penyelai tu nyadi pengering ti patut dijaga semua kitai,” ku iya ba Pesan Hari Raya Aidilfitri 2026.

Berebak enggau nya, ku iya, semangat penyerakup, bebaik enggau mereti ke pangan diri nyadi pugu pekara ti nentuka pemansang Sarawak terus maju enggau lantang.

Berindik ari nya, iya meransang semua raban ngena Hari Raya nyadi peluang ngerapitka agi kaul begulai ukai semina raban orang Islam aja, tang mungkur semua rayat nadai ngira tirai juru.

“Ari semangat penyerakup enggau segulai sejalai, rayat ulih sama gawa ke pemansang enggau pengelantang Sarawak,” ku iya.-EDISI UKAS

Pemberita: Grace John Lee