KUCHING: Sarawak benung ba batang pejalai pemansang ngamat visyen 2030 baka ti bisi ba Strategi Pemansang Pengudah COVID-19 (PCDS) 2030.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, nyadi siti kandang menua ti besai, Sarawak diatu ba batang pejalai nyeruri sistem infrastruktur jalai alun enggau perengkaguna pemun, kelebih agi bekal ai enggau kuasa karan, enggau bungkur arus internet.

Ku iya, pengawa tu diseraris enggau bemacham inisiatif strategik dikena ngaga transformasyen ekonomi Sarawak ngagai ekonomi bepenatai pemisi tinggi, ari negapka bidang teknologi tinggi, inovasyen, rega tambah enggau pemeruan rampa menua.

“Perintah Gabungan Parti Sarawak (GPS) meri perati besai ngagai pengawa nyerungkai bidang Sains, Teknologi, Injiniring enggau Matematik (STEM). Kitai dekaka rebak biak Sarawak ukai semina nyadi penguna teknologi aja, tang penengkebang enggau pengemudi teknologi.

“Ba bidang semikonduktor, kitai udah chakah ngatur pengawa nempa pakar lokal ke alai tiga nembiak nyulut Sarawak deka dianjung nampung pelajar ngagai tikas Doktor Falsafah (PhD) ba bidang semikonduktor di Universiti Bristol, United Kingdom.

"Inisiatif tu ukai semina simbolik, tang pengawa meranak puku timpuh panjai dikena nempa pakar lokal ti ulih nyukung industri semikonduktor di Sarawak,” ku iya ba Pesan Khas serimbai Hari Raya Aidilfitri 2026.

Premier Sarawak madah, perintah nengeri mega deka numbuh ekosistem industri ngena teknologi tinggi ti entap ari pansik enggau pemansang (R&D), ngaga tukuh chip, nyentuk ke kilang enggau aplikasyen industri.

Iya nerang, ari nempa pakar kediri, iya andal ke Sarawak ulih ngati kediri nyadi pemekuh ti dikeandal ba rentayan bekal chip global ti majak nambah ba jeman artificial intelligence (AI) kemaya hari.

“Ba bidang aeroangkasa, Sarawak bela nyerungkai pemansang teknologi satelit mit baka CubeSat.

“Pengawa tu ngerandang peluang ngagai bala anak biak ngaul diri ba bidang injiniring angkasa, analisis data satelit enggau aplikasyen teknologi angkasa ti dikena ba betanam betupi, matau rampa menua, ngatur penusah enggau perambu mengeri.

“Kitai dekaka Sarawak berani bisi juluk besai ukai semina nimpai bintang di langit aja, tang ulih nyerungkai enggau beambi ulih ba nya ungkup pengelantang rayat," terang iya. -EDISI UKAS