Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar madah, nengeri tu majak nurai pemujur ti ngemegah nyengkaum nengah kerejasama strategik enggau Bank Dunya ti negapka agi atur gawa, perambu fiskal enggau ngayur Dagang Enggi Perintah (State Owned Enterprise).

Ku iya, Sarawak mega negapka penuduk nyadi pengemudi inovasyen nengah pengawa ngelancharka projek pemansang digital enggau teknologi tinggi baka KETEQ.AI kelimpah numbuh siti kompeni penerebai enggi nengeri iya nya AirBorneo bulan Disember taun nyin tadi.

“Tu disadang beguna endar dikena nyukung ekonomi tumbuh, nambah aksesibiliti peranak menua pesisir sereta negapka rentayan penyambung langit serantau kelebih agi di Sarawak.

“Tu mega nyadi lambang ekonomi angkat, negap rayat enggau dudi hari ti ulih besemekih,” ku iya ba Pesan Khas Hari Raya Aidilfitri 2026.

Tun Pehin Sri Dr Wan Junaidi madah baru, industri teknologi enggau inovasyen mega majak narit ati pemeranak puku strategik nengah pemansang ekonomi hidrogen, kerejasama antarabansa ba teknologi kuasa gadung, meranak puku palan data besai enggau negap ekosistem digital nengah Sarawak Digital Economy Corporation (SDEC).

“Inisiatif tu negapka penuduk Sarawak nyadi hab kuasa beresi enggau ekonomi digital serantau, lalu nyukung transformasyen ekonomi dudi hari,” ku iya.-EDISI UKAS