SCS Ngamat Polisi Perintah Ba Asil Nyata Ke Pengelantang Rayat
KUCHING: Servis Perintah Sarawak (SCS) terus ransing gawa nentuka tetiap polisi, perambu enggau inisiatif perintah nengeri dikeamat nyadi asil nyata ti ulih diasai rayat.
Sekretari Perintah Sarawak, Datuk Amar Mohamad Abu Bakar Marzuki madah, pemujur SCS bepanggai ba penegut kerejasama beraban sereta semangat segulai sejalai ba staf perintah nentuka servis diberi nemban enggau besai empas.
Ku iya, semua staf perintah patut gawa nyadi siti tim ti tegap nentuka hak Sarawak terus dijaga enggau ditegap.
“Semangat Aidilfitri ti deka dirami patut nyadi peransang ba Servis Perintah Sarawak sama nyingkang ngagai siti tuju enggau pengawa nemban nitih tanggungpengawa ti udah dilempai,” ku iya.
Iya nibar ke jaku nya ba Pesan Khas serimbai Hari Raya Aidilfitri 2026.
Iya mega nangkan semua, ba dunya ti seruran berubah, staf perintah enda ulih kelalu jampat tepantup ati ba pemujur dijapai, tang patut terus nambah penau, nambah chara gawa enggau berani berubah.
iya nerang, nya awak ti patut ngagai semua raban servis perintah nyingkang ke mua enggau ati ransing agi, sikar enggau belalauka asil.
“Aram kitai ngena peluang Syawal tu endur belemati ke diri, ngemaru ke juluk enggau nyingkang ke mua ngena ‘revisit, rethink dan recharge’,” ku iya.
