MUJONG BALEH: Perengkaguna pemun menua pesisir majak ditambah nengah projek ngaga serungap atap di Rumah Mansai, Nanga Sengkabang, Sungai Majau kelimpah peminta nambah peneras arus telekomunikasyen ba menua ulu.

Sapit Menteri Digital ti mega Kaban Parlimen Hulu Rajang, Datuk Wilson Ugak Kumbong madah, tuju projek nya nambah pengelantang, pengelikun enggau peranak nyamai ngereja pengawa besehari-sehari ba pelaman rumah panjai.

“Projek tu ukai semina meri pengelantang ngagai peranak aja, tang nentuka pengelikun sida tejamin agi, kelebih agi lebuh ngereja pengawa besehari-sehari ba pelaman rumah panjai.

“Pia mega, kitai nemu arus telekomunikasyen agi lubah ditu lalu pekara tu deka dibai ngagai Komiti Besai Komunikasyen enggau Multimedia Malaysia (MCMC) ngambi pengawa patut dipejalai,” ku iya.

Iya nyebut jaku nya ba Pengerami Bejadi Projek Ngaga Serungap Atap ditu, Hari Tiga.

Berebak enggau nya, iya mega bisi ngemendarka sekeda agih belanja dikena nyukung pemansang komuniti dia, nyengkaum RM10,000 ngagai Komiti Pemansang enggau Pengelikun Genturung Pendiau (JKKK), RM5,000 ngagai Biro Indu sereta Geran MRP RM20,000 ungkup projek batu kuari.

Kelimpah ari nya, pemeri tambah RM5,000 mega diberi ngagai Biro Indu ti bisi datai ngaul Rumah Ajai enggau Rumah Nyandang, Sungai Majau.

Inisiatif nya ngayanka perintah naka ulih nentuka pemansang menua pesisir dipejalai inklusif, nyerangkung infrastruktur fizikal sereta peminta digital ungkup pengelantang rayat. -EDISI UKAS