PUTRAJAYA: Mensia mayuh dilalau bekelimat ngena bekal kuasa karan enggau ai sekumbang hari besai Hari Raya Aidilfitri, laban disadang nambah ba timpuh nya.

Sapit Menteri Besai, Datuk Amar Fadillah Yusof madah, pengawa bekenaka bekal kuasa karan ba rumah suah agi nambah entara 20 ngagai 40 peratus dibanding hari bukai, seraya ai disadang nambah urung 30 ngagai 35 peratus, kelebih agi ba nengeri ti mayuh orang pulai ke menua ngintu Hari Raya.

Ku iya, pekara nya begunaka kerejasama semua raban nentuka pemansut bekal kuasa enggau ai seruran meruan sereta enda nating sistem bekal ti bisi diatu.

“Pengawa bekelimat ti muntang baka madam suis kereban karan enti enda dikena, nyeliah mod nganti, netap penyelap aircon entara 24 ngagai 26 darjah Celsius sereta ngena kereban ti ulih ngelimat karan ulih meri empas besai,” ku iya ba siti penerang media, ditu, Hari Lima.

Ba pengawa bekenaka ai, ku iya, per kapita besehari-sehari maksimum 160 liter ti ditetapka Komiti Besai Servis Ai Menua seriris enggau standard antarabansa lalu tau dijapai ari disiplin bala penguna.

Entara inisiatif diperansang nyengkaum ngadu jampat paip ti pantis, ngena pemansut ai alternatif baka ai ujan, bekelimat ngena ai sereta ngena baru ai ti enda kamah ungkup pengawa besehari-sehari.

Berebak enggau nya, iya madah ke operator bekal ai udah besikap enggau pelin kontigensi dikena napi sebarang ti tau nyadi sekumbang hari besai, nentuka bekal ai tegap ungkup penguna.

Kelimpah ari bekelimat, Menteri Idar Kuasa enggau Transformasyen Ai nya mega madah ke pemesai guna bekal kuasa karan ti likun, nyengkaum nentuka sambung tali karan ba rumah nya manah, enda kelalu mayuh kereban dikena ba siti soket lalu ngena kereban ti bisi setipikit pengelikun aja.

“Pekara pengelikun tu beguna endar dikena nyeliah sebarang penusah dikeenggai, kelebih agi mayuh orang pulai ke menua tauka lama ninggalka rumah,” terang iya.

Iya mega madah, pengawa nya seriris enggau juluk Malaysia MADANI ti berati ke pengelantang rayat, pemeruan enggau ngatur pemansut kuasa ti nemban.

Iya nyemetak madah, pengawa bekelimat ngena bekal kuasa karan enggau ai ukai semina mantu ngelimat bayar bil ruang bilik aja, tang nyukung agenda menua nentuka pemansut semampai bisi, ulih beretan enggau nangkup peminta penguna dudi hari. -EDISI UKAS