SIMANGGANG: Projek ngaga Jalai Brayun-Basi enggau nuju Lubok Tedong, Engkilili ti beungkus RM74 juta diatu benung ditinda.

Sapit Menteri Pelajar, Inovasyen enggau Pemansang Penau Sarawak, Datuk Francis Harden Hollis madah, projek nya deka dipun enggau ngaga jalai alun penyauh 10 kilometer belabuh ari Brayun nuju Basi sebedau rentayan jalai sepanjai 13 kilometer digaga ari Basi nuju Lubok Tedung.

Nitih penerang, lebuh tembu ila, Projek Jalai Basi tu deka nyambung Pasar Simanggang ke Jalai Besai Pan Borneo di Kampung Stuga, Engkilili enggau meri pemaik ngagai 10 rumah panjai sereta dua sekula primari ba sitak nya.

Iya nyebut pekara lebuh nerima penemuai raban Radio Televisyen Malaysia (RTM) Sri Aman ba Palan Servis Kaban Kunsil Nengeri (ADUN) Simanggang, ditu, Hari Empat.

Kelimpah ari nya, iya ti mega ADUN Simanggang mega madah ke raban Agensi Pemansang Sri Aman (SADA) udah ngemendarka projek ngaga jalai 10 kilometer pemanjai ti nyambung sitak Entulang Bungkang ke Taman Harmoni ditu.

Ku iya, nya sebagi ari Projek 'Simanggang Link Road', enti jalai mintas ari Jalai Besai Pan Borneo ngerenchah Entulang Bungkang tembu digaga ila, penguna deka bisi akses muntang agi ke pasar.

Dulu ari nya, raban RTM Sri Aman betuai ke Regina Ho udah ngatur randau enggau Harden ngambi berandauka perambu ngatur dua program iya nya Pekit Karaoke Lagu Gawai enggau 'Story Telling' ngena jaku Mandarin.

Taja pia, endur enggau haribulan ngatur dua program nya apin diputus seraya Pekit Karaoke Lagu Gawai dilanggur diatur pun bulan Mei tu. -EDISI UKAS