KUCHING: Perintah Sarawak majak negap pengawa ngundang rayat nengah Program Sarawakku Sayang 2026 nyadi pelasar bejalaika bemacham servis perintah terus ngagai rayat.

Program nya inisiatif tin ngena chara ngundang rayat ngambi mereti ke agi sada peminta renggat baru kelimpah nyendiaka siti pelasar Palan Ditapat (One-Stop Centre) ti ngempuruka agensi perintah, kompeni bekaul perintah (GLC), gempung ukai dikuasa perintah (NGO) enggau sektor peribit.

Nengah pelasar nya, rayat bulih akses ba mayuh servis mungkur beperesa pengerai, bantu pelajar, peluang dagang, servis ngintu pengelantang sereta servis digital nyengkaum mayar bil utiliti, saman enggau chukai tanah.

Program nya bepuguka sekeda konsep baka chara ngundang rayat, program nambah penemu pasal polisi enggau inisiatif perintah, nyendia servis chara outreach sereta kaul rat entara rayat enggau perintah ti ngemauka feel good factor ba komuniti.

Seriris enggau nya, tuju program nya diatur bejalaika polisi enggau inisiatif perintah, negap kaul perintah enggau rayat menua sereta narak semangat segulai sejalai, penyerakup enggau penaluk ke Sarawak.

Program Sarawakku Sayang mega mungkur lima komponen besai iya nya program rasmi, pemandang, kaunter servis, bansal bejual orang dagang enggau aktiviti ngaul komuniti.

Komponen pemandang nengah Sarawak Pavilion ti mandangka pemujur, pengawa enggau juluk pemansang nyengkaum rentayan jalai alun, bekal ai enggau kuasa karan, seraya kaunter servis nyendiaka bemacham servis ti nyelinting pengerai, pelajar, pengawa dagang, ngintu pengelantang sereta digital enggau inovasyen.

Kelimpah ari nya, bansa bejual nengah Sarawak Kitchen meri peluang ngagai orang dagang lokal ngelaku produk pemakai enggau krafjari seraya aktiviti ngaul komuniti mungkur program lumba enggau main sereta rekreasyen baka fun run, main rayat, pemerindang main asal, pemerindang enggau e-pekit.

Isi program pengelama tiga hari mungkur bemacham aktiviti nyengkaum pemandang besai, program rasmi, main rayat, konsert, aktiviti komuniti sereta program pengerai baka senamrobik enggau fun run sebedau diujung enggau pengerami penutup.

Ba taun 2026, program tu diatur ba 12 bagi menua dipun enggau Limbang kena 10 ngagai 12 April tu di Kompleks Lumba, Limbang enggau pengerami bejadi disadang dipenyadika Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.

Program sama deka diatur di Miri kena 24 nyentuk 26 April di Stadium Miri sereta Bintulu ari 22 ngagai 24 Mei di Taba Padang Bilun Lama, Bintulu.

Udah nya, program deka ditampung di Mukah kena 19 hingga 21 Jun di Dataran Pehin Setia Raja, sebedau belidar ke Sibu ari 26 nyentuk 28 Jun di Dataran Bandar Sibu lalu Kapit kena 10 ngagai 12 Julai di Pelaman Balai Suarah.

Ungkup bulan Ogos, program deka diatur di Sarikei ari 7 nyentuk 9 Ogos di Kompleks Lumba Sarikei, dientudi Betong kena 4 ngagai 6 September di Kompleks Lumba Betong sereta Sri Aman ari 25 ngagai 27 September di Kompleks Lumba Sri Aman.

Program tu udah nya deka diatur di Serian kena 16 nyentuk 18 Oktober di pelaman Entepan Kerita Serian Conference Centre, sebedau ditampung di Samarahan ari 30 Oktober nyentuk 1 November di pelaman besai sepiak Kaunsil Mengeri Kota Samarahan lalu udah nya di Kuching kena 20 ngagai 22 November di Metrocity, Matang.

Pejalai program tu diseraris Unit Patau Pejalai Sarawak (SIMU) enggau kerejasama mayuh opis menteri, opis sereta agensi bekaul ba renggat nengeri enggau bagi menua nentuka program lanchar enggau nyapai tuju.

Ari nya, Program Sarawakku Sayang 2026 tu ngayanka Perintah Sarawak seruran ransing nentuka nadai rayat dikelaung ari arus pemansang, kelimpah negap pengelantang sosial, penyerakup enggau pengandal rayat ba pemansang nengeri.-EDISI UKAS