Yang di-Pertua Negeri Sarawak & Premier Sarawak Ngerichah Sembiang Aidilfitri
KUCHING: Pagi 1 Syawal di Masjid Jamek Negeri Sarawak richah enggau semangat segulai sejalai lebuh Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar enggau Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg datai sembiang Aidilfitri begulai enggau beribu orang Islam, kena Hari Enam.
Penatai seduai nya ukai semina ngerichah Aidilfitri aja, tang ngayanka semangat segulai sejalai enggau penyerakup ti terus nyadi pugu pengelantang Sarawak.
Tun Pehin Sri Dr Wan Junaidi datai pukul 7.55 pagi, seraya Premier Sarawak datai tumu agi urung pukul 7.45 pagi.
Sembiang Aidilfitri betuai ke Imam Besai Sarawak, Sahibul Fadhilah Dato Mustapha Kamal Ahmad Fauzi enggau lebih 5,000 orang Islam ti datai ngerichah 1 Syawal.
Tembu sembiang, program ditampung khutbah Aidilfitri pejuluk ‘Syawal: Bangkit Dari Ujian, Bersatu Dalam Keimanan’ ti berati ke nilai beterima kasih, penyerakup enggau pengering napi penguji.
Tembu sembiang, Tun Pehin Sri Dr Wan Junaidi ditaga ngulu Pengerami Nerima Pengabang Aidilfitri di Astana Negeri Sarawak berengkah pukul 10 pagi nyentuk 4 lemai.
Sama datai sembiang Aidilfitri Speaker Kunsil Nengeri (DUN) Sarawak, Tan Sri Datuk Amar Mohamad Asfia Awang Nasar, Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah, Sekretari Perintah Sarawak, Datuk Amar Mohamad Abu Bakar Marzuki, Yang Dipertua Kaunsil Islam Sarawak, Datuk Misnu Taha sereta bala bukai.-EDISI UKAS
