Astana Sarawak Ditapat, Lebih 20,000 Ngerichah Pengerami Nerima Pengabang Aidilfitri
KUCHING: Pengerami Nerima Pengabang Hari Raya Aidilfitri 2026 Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar di Astana Sarawak kena 1 Syawal nerima timbal chukup manah lebuh lebuh 20,000 datai ari pupu bansa ngabang kia.
Taja pengerami berengkah pukul 10 pagi, tang dibai ati gagit, dia sida datai tumu ba pelaman Astana Sarawak pukul 8.30 pagi ngambi sama ngerami Aidilfitri enggau ati lantang.
Pemayuh tubuh bala pengabang ngayanka pengerami nerima pengabang tetap nyadi pelasar ngempung rayat, kelimpah narak ulah bebaik enggau segulai sejalai ba rayat pupu bansa di Sarawak.
Dulu ari nya, Tun Pehin Sri Dr Wan Junaidi enggau bini, Toh Puan Datuk Patinggi Fauziah Mohd Sanusi ngelalu penatai bala pemesai Sarawak sereta temuai dipebasa.
Entara bala ti bisi datai nyengkaum Sapit Menteri Besai, Datuk Amar Fadillah Yusof, dua Sapit Premier Sarawak, Datuk Amar Douglas Uggah Embas enggau Datuk Amar Profesor Dr Sim Kui Hian, Speaker Kunsil Nengeri (DUN) Sarawak, Tan Sri Datuk Amar Mohamad Asfia Awang Nasar, bala Menteri Kabinet Sarawak enggau Perintah Besai, Sejretari Perintah Sarawak, Datuk Amar Mohamad Abu Bakar Marzuki, bala Sapit Menteri, bala tuai opis enggau temuai dipebasa bukai.
Muak ke tengah hari, Tun Pehin Sri Dr Wan Junaidi enggau Toh Puan Datuk Patinggi Fauziah mega bisi nabi bala pengabang, lalu nya ngasuh pengerami richah agi.
