KUCHING: Pengerichah Pengerami Nerima Pengabang Hari Raya Aidilfitri 2026 Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar di Astana Sarawak sehari tu ukai semina didedat bala pengabang aja, tang richah enggau bemacham cherita sereta kenang berega ari sida ti datai ngabang.
Ba pengabang ari Amerika Syarikat, Iain Goddard, iya berupai gagit endar laban bisi peluang ngabang baru pengudah kenang ngabang taun nyin tadi.
“Kami kala ngabang ba Pengerami Nerima Pengabang Hari Raya taun nyin tadi ba Palan Konvensyen Borneo Kuching lalu taun kami ngiga peluang ngabang sekali da.
“Aku chukup gaga ulih datai laban pengerami chukup richah. Aku mega gaga meda pekayan asal ti manah enggau dilagu ti narit ati.
“Ari peneleba ngabang sebedau tu, aku pechaya pemakai ti dinah tentu mega nyamai.
“Selamat Hari Raya ngagai semua ti ngintu hari besai tu,” ku iya lebuh dirandau UKAS ba pengerami nerima pengabang nya.
Seraya pengabang ari Perak, Raja Rafirah Begum Raja Muhamad madah ke pengerami ngintu Aidilfitri di Sarawak siti kenang ti negu ati enggau besai reti.
Ku iya, iya diatu nitih laki ti asal ari Sarawak ngintu hari besai nya di nengeri tu pengudah lenyau diri sebilik sepiak apai.
“Tu terubah aku ngintu enggau datai ngabang ba Pengerami Nerima Pengabang Hari Raya di Sarawak lalu ati chukup gagit meda pengerichah bala.
“Dibanding di Semenanjung, aku nadai kala ngasai ngintu rayat baka suba laban kami sebilik sepiak apai udah nadai, tang ditu nyau asai diri sebilik empu begempuru.
“Kenang tu chukup besai reti ba aku. Selamat Hari Raya Aidilfitri, minta ampun ngagai semua,” ku iya.
Ba pengabang lokal, Henry Chuo ari Kuching, bala mayuh ti datai taja hari angan nyata ngayanka pengagit ngintu Aidilfitri agi berasai.
“Aku gaga laban ulih datai ngabang ngagai Yang di-Pertua Negeri Sarawak ba hari keterubah ngintu Hari Raya Aidilfitri tu.
“Taja hari angat, tang pemayuh tubuh bala pengabang ti datai ngayanka semangat Aidilfitri agi tegap enggau richah.
“Aku deka meri Selamat Hari Raya Aidilfitri ngagai semua orang Islam, ngarap ke terus ngintu berami enggau richah, ngusung pangan diri sereta ngerapit kaul,” ku iya.
Penatai bala pengabang ari mayuh tirai juru mandangka Sarawak nyadi palan ditapat dagang temuai budaya, kelimpah semangat penyerakup enggau kaul bebaik rayat pupu bansa ti nyadi kunchi penyerakup nengeri tu.-EDISI UKAS
