SIBU: Inisiatif ngaku tanah Adat Bansa Asal (NCR) di Siong Ili chakah dipejalai ari nyukat ngaul lapan rumah panjai di sitak nya.

Kaban Parlimen Selangau, Edwin Banta madah, inisiatif nya beguna endar nentuka tanah adat disukat sistematik sereta diaku perintah.

Iya nyebut pekara nya lebuh ngetuaika Randau Nyukat Tanah NCR di Rumah John Antieng, Siong Ili, empai lama.

Program diatur Opis Tanah enggau Survei Bagi Menua Sibu enggau kerejasama Palan Servis Parlimen Selangau nya mega ngaul tuai rumah enggau peranak dia.

Ba randau nya, Pegawai Tadbir Tanah, Vivilyn Wesley Kapi meri penerang bekaul atur, dokumentasyen enggau pengawa nyukat tanah NCR.

Pengawa nyukat nitih langgur nya dikeandal ulih ngerumban pengawa ngaku enggau ngurangka peranak betalat dudi hari.

Seraya Komiti Pemansang Siong Ili betuai ke Tony Emat mantu nyeraris pejalai program ari numbuh komiti khas.

Inisiatif nya dikearap nambah pemereti ati peranak enggau negap kerejasama entara agensi perintah enggau komuniti ba pengawa ngintu hak tanah adat.-EDISI UKAS