BETONG: Hari Raya Aidilfitri diintu terus nyadi pelasar beguna negap penyerakup lebuh bala tuai nurun ngabang ngagai rayat renggat baruh.

Sapit Menteri Nembiak, Lumba enggau Pemansang Orang Dagang ti mega ADUN Layar, Datuk Gerald Rentap Jabu enggau bini, Datin Rosemarie Wong nurun ngabang ke Kampung Melayu Betong, kena Hari Enam.

Seduai ngabang ari pukul 3 ngalihari nyentuk 5.30 lemai ngagai tiga genturung pendiau iya nya Kampung Masjid, Kampung Tengah enggau Kampung Hilir, ke alai 50 peranak bukai mega sama ngabang.

Ku Datuk Gerald, pengawa ngabang ngagai pangan diri serimbai Aidilfitri patut seruran dikemeran laban beguna endar negap kaul enggau narak semangat penyerakup ba rayat pupu bansa di Sarawak.

Iya mega madah, pengawa nya ukai semina ngerapit kaul aja, tang nyadi pun ngagai penegap sosial ti beguna ungkup pemansang.

Iya ngena peluang nya meri terima kasih udah ngelalu penatai sida sereta meri Selamat Hari Raya Aidilfitri ngagai semua ti datai.

Berebak enggau nya, iya nyemetak madah ke penyerakup tegap ba rayat deka ngasuh agenda pemansang perintah muntang dipejalai ungkup pengelantang rayat.

Iya mega meransang bala Tuai Raban Bansa enggau Tuai Komuniti (KMKK) terus nyadi jematan entara perintah enggau rayat.

Sekumbang ngabang, iya bisi niki ngagai sekeda rumah bala tuai komuniti kelai ngenang jasa enggau pemanah pengawa sida nyaga pengelantang enggau pemansang genturung pendiau.

Sama ngabang, Pemancha Iban Pelilih Betong Norman Ngumbang, Penghulu Sitak Kampung Melayu Betong Kon @ Sapawi Yahu, Penghulu Stanley Ejau Erin, Penghulu Sebastian Kadam Randy, Kaunselor Abdul Rahim Jaini sereta bala tuai genturung pendiau bukai. –EDISI UKAS