SIBU: Pejalai ngabang Aidilfitri terus dikena nyadi oelasar strategik negap rentayan komuniti enggau kaul entara bala tuai enggau rayat di sitak Kunsil Nengeri (DUN) Pelawan.
Sapit Menteri Pengerai Mensia Mayuh, Pengawa Berumah enggau Perintah Lokal, Datuk Michael Tiang Ming Tee madah, pengawa ngundang rayat nya ngasuh interaksyen semak agi kelimpah ngerapit kaul enggau serap komuniti.
Pejalai ngabang dipun ba rumah Chairman Masjid Darul Firdaus, Junaidi Mohamad Mokhtar sebedau ngelawa rumah Tuai Nembiak PBB Pelawan, Abang Mohamad Hafiq Abang Kassim.
Raban sida udah nya ngabang ngagai Chairman Ngaga Masejit Baru, Masjid Darul Firdaus Apollo Sibu, Hamzah A. Beraan, ke alai randau bisi ngenang pejalai projek ngaga masejit nya.
Kelimpah ari nya, iya mega bisi limpang ngabang ngagai Tuai Indu AJK Masjid Darul Firdaus ti mega pengari Kawasan Rukun Tetangga (KRT) Apollo Deshon Sibu, Dayang Siti Khaminah Abang Bolhassan.
Ku iya, pengawa baka nya ukai semina ngidupka pengerichah hari besai aja, tang nyadi pelasar beguna mereti ke peminta kebendar komuniti renggat baruh.
Iya mega madah, kerejasama rat entara bala tuai enggau komuniti beguna endar nentuka pemansang ba menua lanchar enggau inklusif.
Program nya ngayanka chara negap kaul komuniti enggau penyerakup seruran dipejalai nipak semangat Aidilfitri.-EDISI UKAS
