BETONG: Indu nyadi tuai ba renggat rumah panjai diatu majak diaku lebuh 14 Tuai Rumah indu dichiri ba sitak Betong, lalu nya ngayanka ubah positif ba tusun sosial peranak menua pesisir.

Sapit Menteri Nembiak, Lumba enggau Pemansang Orang Dagang Sarawak, Datuk Gerald Rentap Jabu madah, indu diangkat nyadi tuai komuniti ukai semina nunjukka penau sida nyadi tuai, tang mantu negap kerejasama peranak ti ngemujurka bemacham inisiatif pemansang.

“Kaul indu ba pengawa ngetuaika rumah panjai ukai semina nunjukka ubah positif aja ba rayat, tang mantu negap kerejasama ba peranak dikena ngemujur bemacham program pemansang.

“Kitai meda indu diatu ukai semina ngintu ruang bilik aja, tang mega ulih nyadi tuai komuniti ti manah, lalu gawa ke pemansang menua pesisir ti inklusif agi,” ku iya ba mua mayuh rambau program Tuai Begulai Enggau Rayat di Rh. Spell Anak Gelayan, Selulap, kena Hari Minggu.

Iya madah baru, pangku pengawa tuai genturung pendiau enggau tuai rumah agi nyadi pun pengawa nentuka tetiap langgur pemansang perintah ulih datai ba rayat, kelebih agi ba rumah panjai.

Ku iya, bemacham projek dipejalai nengah Agensi Pemansang Bagi Menua Betong (BDDA) terus nyadi penyungkak ngagai transformasyen menua pesisir, nyengkaum perambu ngaga Jalai Baru ke Tebalau Ulu, Layar berega RM10 juta ti diatu benung dilangkar.

Seraya Kaban Ahli Parlimen Betong, Dato Dr Richard Rapu madah, pemansang ba sitak nya ukai semina meri perati ngagai infrastruktur aja, tang ngaul pengawa negap sosioekonomi sereta ngangkat kualiti idup peranak menua.

Ku iya, inisiatif perintah nengeri ba pekara pelajar nyengkaum melanja bayar belajar ba semua universiti enggi Sarawak berengkah taun 2026 deka ngerandang peluang besai ngagai bala nembiak, kelebih agi ari menua pesisir, nampung pelajar ngagai tikas tinggi agi.

Ngenang pekara sama, iya mega ngemendarka pemeri RM5,000 ngagai Komiti Pemansang enggau Pengelikun Genturung Pendiau (JKKK) Rumah Panjai Selulap dikena nyaup ngatur aktiviti komuniti.

Ba program nya mega, setipikit chiri disua ngagai bala tuai rumah ti baru dipadu gawa enggau nampung baru pengawa ngaul 31 rumah panjai ba sitak nya.

Sama datai, Residen Bagi Menua Betong, Datu Richard Michael Abunawas, Pegawai Pelilih Betong, Laga Kueh, Pegawai Betanam Betupi Bagi Menua Betong, Leo Toni, Pemancha Iban Pelilih Betong, Norman Ngumbang, Penghulu Sitak Layar Tengah, Stanley Ejau Erin sereta Tuai Rumah Spell Gelayan, Tuai Rumah Panjai Selulap. -EDISI UKAS