LAWAS: Pengerichah Aidilfitri berasai endar lebuh pengabang nedat Pengerami Nerima Pengabang Aidilfitri diatur Sapit Premier Sarawak, Datuk Amar Awang Tengah Ali Hasan sereta bini Dato Dayang Morliah Awang Daud di Hotel Seri Malaysia ditu, Hari Minggu.

Tumu pagi, mensia mayuh datai enggau diri sebilik, ngena pekayan asal bemacham chura, nya ti mandangka pengelantang ari semangat penyerakup pupu bansa di Sarawak.

Nembiak mit dipeda gagit endar makai, seraya orang besai tuai enda masau peluang berandau enggau bala tuai ti kemerah.

Pengerami nya ukai semina endur serumpu makai pemakai asal aja, tang nyadi pelasar ngerapit kaul entara tuai enggau rayat.

Sama datai, Sapit Menteri Pengangkut, Datuk Hasbi Habibollah, Sapit Menteri Industri Pemakai, Komoditi enggau Pemansang Kandang Menua Sarawak, Datuk Dr. Abdul Rahman Ismail, Kaban Parlimen Lawas Dato Henry Sum Agong, Kaban Kunsil Nengeri (ADUN) Batu Danau, Dato Paulus Palu Gumbang sereta pengabang dipebasa bukai.

Mensia mayuh ti empai ngabang ditesau sehari tu hari kepenudi pengerami nya diatur ti nyai peluang pemadu manah begulai ngerami Aidilfitri ba semangat segulai sejalai.-EDISI UKAS