MIRI: Ngabang serimbai Hari Raya Aidilfitri terus nambah penegut penyerakup pupu bansa di sitak Piasau.

Sapit Menteri Dagang Temuai, Industri Kreatif enggau Seni Pemerindang Sarawak ti mega Kaban Kunsil Nengeri (ADUN) Piasau, Datuk Sebastian Ting Chiew Yew enggau bala bukai sama ngabang ngagai sekeda rumah tuai raban bansa enggau tuai komuniti di Kampung Luak, serimbai ngintu Aidilfitri hari kedua kemari.

Entara rumah ditiki sida nyengkaum Temenggong Abang Mohamed Othman, Tuai Raban Bansa Rahaman Bolhasan sereta Kaunselor Yusri, kelimpang ngusung rayat megai pengarap Islam dia.

Ku iya, pengawa ngabang dikemeran rayat Sarawak mandangka pengelantang enggau penegut kaul entara raban bansa enggau pengarai di nengeri tu.

“Hari Besai baka Hari Raya Aidilfitri meri peluang ngagai kitai ngundang pangan diri, berandau enggau ngerapit kaul, lalu negapka semangat penyerakup ti udah lama ditanggam,” ku iya lebuh dirandau ba pejalai ngabang nya.

Iya madah baru, budaya ngabang ti diintu manah ukai semina negap kaul aja, tang narak ulah bebasa enggau mereti ke pemesai guna kaul rama ba rayat.-EDISI UKAS