LUNDU: Kaban Kunsil Nengeri (ADUN) Billy Sujang madah ke diri deka seruran gawa nentuka pemansang rumah sembiang ba sitak dipegai iya ulih dipejalai manah, nyengkaum pengawa ngiga belanja tambah dikena melanja projek dia.

Bejaku ba mua mayuh rambau Pengawa Merekat enggau Nasih Tanah Taba Chapel St Jacob baru di Kampung Temaga Dayak kena Hari Minggu, iya meri terima kasih ke kerejasama rat raban gerija enggau komuniti menua nya ngemujurka pengawa sehari nya.

Ku iya, taja projek ngaga chapel nya bisi nerima agih belanja tumu, tang penyampau apin chukup dikena mayar semua ungkus dipelaba RM1 juta.

Berindik ari nya, Billy meri jamin deka terus ngatur pengawa ngiga belanja tambah nentuka projek nya ulih tembu ungkup pemaik komuniti dia.

“Enti tembu ila, chapel tu ukai semina nyendia endur sembiang ti lantang aja, tang nyadi palan negap pemanah ulah, penyerakup enggau kaul diri sebilik ba komuniti,” ku iya.

Dulu ari nya, iya mega bisi nyua belanja tambah penyampau RM200,000 ari belanja Unit Pekara Pengarap Bukai (UNIFOR).

Sama datai, Bishop Gerija Anglican Sarawak Datuk Donald Jute. -EDISI UKAS