SIMANGGANG: Kaunsil Pelilih Sri Aman (MDSA) udah dipilih nyadi tuai rumah pengatur Program 'Earth Hour' renggat Raban Bekuasa Lokal (PBT) Sarawak 2026 kena 28 Mac tu.

Pekara nya udah dibantaika Chairman MDSA, Kaunselor (Kr) Anthony Abell Chendan ba aum media Program 'Earth Hour' Renggat PBT Sarawak 2026 di Bilik Aum MDSA, tadi.

Ku iya, program 'Earth Hour' nya deka dipun enggau aktiviti bukai kena 27 Mac iya nya ngaga sabun ari minyak makai udah dikena enggau pekit nyura renggat sekula.

“Muak ke pagi 28 Mac, raban kami deka ngatur aktiviti beripai begulai enggau peranak Sri Aman, nyendiaka kaunter minta lisin nginang ukui enggau chukai ba ringkat baruh begunan Librari MDSA enggau senamrobik.

“Sapit Premier Sarawak, Datuk Amar Dr Sim Kui Hian deka ngaga simbolik bejadi program tu kena 8.30 malam di Mini Stadium Sri Aman enggau madam lampu pengelama sejam seretai begulai enggau agensi perintah ditu,” terang iya.

Iya madah baru, maya aktiviti madam lampu diatur, program nya mega deka meda video bekaul rampa menua enggau ubah klimet.

Anthony ba aum media nya mega madah, program nya deka dipanchar terus ba media rama enggau entara 200 ngagai 250 iku disadang datai ngulu aktiviti nya nengah link diberi ngagai kepada 28 PBT di selampur nengeri tu.

“Aku meransang semua peranak ba Sri Aman sama madam lampu enggau kereban elekterik ti nadai diena pukul 8.30 malam 28 Mac tu kelai sama besaup ngintu rampa menua.

“Kitai andal ke program tu ulih narak chara idup meruan kelimpah ngangkatka Sri Aman nyadi chunto kokuniti ti sir uke rampa menua ngagai orang luar,” ku Abell.

Sama datai ba aum media Program 'Earth Hour' nya Sekretari MDSA, Mohd Rizal Zakaria, Sapit Komiti Pemansang Komuniti enggau Dagang Temuai MDSA, Kr Chin Li Li enggau kaunselor MDSA, Joshua Fam sereta staf MDSA.

Ke penemu mayuh, 'Earth Hour' siti ari inisiatif global dipungkal 'World Wide Fund for Nature' (WWF) enggau mensia mayuh diperansang madam lampu pengelama sejam kelai ngintu rampa menua enggau mutar ubah klimet.

Program terubah diatur taun 2007 di Sydney, Australia ari WWF begulai enggau bakih media sereta komuniti lokal enggau lebuh dua juta peranak sereta 2,000 pedagang madam lampu pengelama sejam kelai siru ke menua.

Pengudah mujur di Sydney, Australia, 'Earth Hour' udah deras ngerembai nyadi pengawa global lebuh lebih 190 menua enggau kandang menua udah ngambi bagi ba program nya diatu. -EDISI UKAS