SIMANGGANG: Sapit Menteri Pelajar, Inovasyen enggau Pemansang Penau Sarawak ti mega Kaban Kunsil Nengeri (ADUN) Simanggang Datuk Francis Harden Hollis udah ngatur pejalai ngabas kedua kali ke taba Projek Jematan Semin meraka Sungai Undop di Kampung Beleti, Sabu, ditu, Hari Dua.

Ku iya, terubah ngabas taba projek nya kena 10 Januari nyi tadi enggau tuju meda asil kereja ngaga jematan nya sebedau diserah ngagai pengempu.

“Ke penerang, projek jematan semina beungkus RM5 juta nya udah digaga kompeni kontraktor ROSBEN Holding Sendirian Berhad enggau Opis Kereja Raya (JKR) Bagi Menua Sri Aman nyadi agensi pengatur.

“Pengawa nyerah ngempu projek deka diatur entara kontraktor nya enggau JKR Bagi Menua Sri Aman sereta Agensi Pemansang Sri Aman (SADA) nyadi penerima seraya penguna ('end user') peranak dia,” ku iya.

Datuk Francis Harden mega madah, projek jematan semin nya udah berengkah ditengah pun taun tu tadi lalu meri pemaik ngagai 14 pintu ruang bilik dipegai Kampung Beleti.

Iya ngarap ke projek ngaga jematan semina nya ukai semina nyadi siti projek infrastruktur di Sri Aman aja, tang lambang pengeran Perintah Sarawak negap rentayan jalai pengangkut menua pesisir.

"Sungai Undop ti ngelama tu napi pemar mobiliti duatu badu nekul laban jematan nya udah meri peluang peranak Kampung Beleti nambahka ekonomi enggau rama sida empu.

“Taja pia, aku ngarap ke peranak Beleti nerima manah projek tu laban udah ngasuh sida lantang nurun ke Pasar Simanggang kelebih agi ungkup pelajar, pegerai enggau dagang mit,” ku iya.

Sama datai Penguasa Tanah enggau Survei Bagi Menua Sri Aman, Michealson Nyisin, Injinia Taba, JKR Bagi Menua Sri Aman, Chang Teck Khung, Penulung Injinia, Wong Lee Khang, pengari ROSBEN Holding iaitu Luke Benjamin enggau Wilfred Gomez , Gailreth Mukit enggau Machelle Lenggang ari SADA, Injinia SIM HO Empire, Owen Chung Jia Hao, Tuai Rumah Maconi Ganda enggau Kaunselor Dilang Jungai.

Dulu ari nya, projek jematan semin nya berengkah digaga 12 Januari 2024 enggau ungkus asal RM4.2 juta pengudah jematan gantung udah repuk enggau enda likun ditengah.

Skop kereja projek nya ngaga siti jematan bansa 'hybrid' sepanjai 70 meter enggau empat meter pemesai.

Projek nya suba deka digaga ngena Program Transformasyen Menua Pesisir (RTP) taun 2018 tang ketegal belanja, projek dibai ngagai SADA taun 2020. -EDISI UKAS