KUALA LUMPUR: Malaysia enda ba kategori menua ti tau dituntung penanggul ‘suntuk ai’ laban menua agi bisi pemansut ai mata ti chukup.
Sapit Menteri Besai, Datuk Amar Fadillah Yusof madah, Malaysia nerima pukul rata lebih 2,500 milimeter ujan setaun enggau anggar pemansut ai ulih dikena baru ngelui ari 580 bilion meter padu setaun tang pemar kebendar ti patut diputar iya nya ari sukut ngatur pemansut ai begulai, ngintu sungai enggau penyikar sistem ngatur ai menua.
“Simpan aktif tekat ai ulih nangkup bekal ai nyentuk 90 hari (tiga bulan).
“Berebak enggau nya, penyampau Ai Nadai Pansut (NRW) nasional agi ba tikas urung 34.3 peratus, sama penyampau 6,000 juta liter sehari ai beresi tebasau.
“Ai tebasau tu dipelaba manggai nyau deka RM2 bilion setaun ari sukut pengulih asil enti penyampau NRW ulih dikurang ngagai 25 peratus saja, menua ulih ngelimat urung 2,000 juta liter sehari ai tambah enda ibuh ngaga loji meresi ai baru,” ku iya ba siti penerang media kena Hari Dua.
Iya nyebut jaku nya nimbal ripot Harian Metro kena 23 Mac 2026 ti minta perintah nengah Opis Menteri Idar Kuasa enggau Transformasyen Ai (PETRA) ngaga pelin strategik dikena mutar penanggul ‘suntuk ai global’.
Datuk Amar Fadillah madah, batang pekara patut diberi perati baka ngatur ai simpan, nagang ngachau endur nimbun ai, ngamahka sungai enggau nadai integrasi entara mayuh pemansut ai alternatif baka mata ai dalam tanah, ai dikandang enggau sungai, ai dikena baru, sistem nimbun ai ujan enggau desalinasi.
Menteri PETRA nya madah, peminta ai menua disadang majak nambah ari 19,372 juta liter sehari taun 2025 ngagai lebih 25,000 juta liter sehari manggai 2030 bepelasarka kapasiti loji meresi ai, lalu nya begunaka perambu loji baru strategik agi.
Iya madah, Malaysia bisi 2,986 sungai ke alai urung 30 peratus sungai besai menua jelan pengamah enggau kamah ketegal teda industri enggau aktiviti guna tanah enda betatak, ti tau ngeruga operasyen loji meresi ai.
“Kandang diatu, penyampau tarif ai ke bisi ba sekeda operator ai semina chukup dikena melanja ungkus diatu.
“Berindik ari nya, bisi peminta ngerumban chara Ngatur Pemansang Ai Begulai (IWRM) ba semua sungai besai menua sereta negap strategi nyimpan ai ari ngaga endur ngandang ai ba tisi sungai, nambah kapasiti enggau guna tekat ai, kar pintar pemansut ai dalam tanah sistematik enggau negap elemen pansik nyerungkai teknologi ti meruan enggau nipak pengawa ngatur pemansut ai,” ku iya.
Datuk Amar Fadillah madah, teknologi digital enggau artificial intelligence mega patut ditambah nengah pemansang hab digital sektor ai tikas nasional ti deka dilanchar enda lama da enggau renggat serantau taun 2040.
Kelimpah ari nya ku iya, chara baru melanja sektor ai nyengkaum kerejasama perintah-perintah enggau melanja prestasi patut dikerembai dikena ngerumban pejalai projek ngurangka NRW enggau pemansang pemansut ai alternatif.
Tu nyengkaum program komunikasyen mensia mayuh mega beguna dikena nambah penemu komuniti ngagai rega ai, laban domestik rayat Malaysia agi 225 liter siku sehari dibanding juluk meruan Gerempung Pengerai Sedunya iya nya 165 liter," ku iya.
"Malaysia ukai menua ti deka suntuk ai tang nadai transformasyen ngatur pemansut ai serap enggau begulai, bekal ai tau tejanggal ba sekeda endur manggai taun 2030.
“Seriris enggau juluk Malaysia MADANI ti berati ke pemeruan pemansuy enggau pengelantang rayat, strategi di baruh langkar AIR 2040, Malaysia ukai semina ulih nyamin bekal ai menua aja, tang ulih nyadi hab penyulut sektor ai serantau manggai 2040," ku iya nyemetak. -EDISI UKAS
