SRI AMAN: Perintah Sarawak naka ulih nentuka peminta rayat menua pesisir diberi perati.
Sapit Menteri Pelajar, Inovasyen enggau Pemansang Penau, Datuk Francis Harden Hollis udah ngatur pejalai ngabas perambu projek nengah Program Transformasyen Menua Pesisir (RTP) ba sitak Kunsil Nengeri (DUN) Simanggang, kena Hari Dua.
Pejalai nya berindik ari peminta peranak menua ngemanah infrastruktur dia, lalu nya ngayanka perintah ninga sada peminta rayat.
Ba pejalai keterubah, iya ngabas taba perambu ngaga entepan entukar baru di Rumah Jacktola Beranchar, Kampung Sungai Labi, Batu Lintang, Undop ti diperati beguna endar dikena nambah pengelantang enggau perengkaguna peranak.
Udah nya, Datuk Francis Harden ngabas Rumah Bericha Jumpu di Temiang Baru, Batu Lintang, Undop nyerenih peminta nyeruri jalai ari genturung pendiau nya ke Jematan Temiang, ti nyadi jalai penyambung sida.
“Pengawa tu beguna endar nentuka endur kebendar projek sereta nyediaka keretas kereja nyengkaum anggar belanja sebedau dibantai ngagai pengari rayat ngambi dikemendar agih belanja RTP,” ku iya.
Iya madah baru, pengudah semua setuju ke ungkus projek, perambu deka diadu ba mayuh renggat pengawa sebedau diberi ngagai Panel Milih Projek RTP betuai ke Residen Bagi Menua.
Panel nya deka nentuka chara projek digaga sekali ke nengah chabut undi, nyiri kontraktor ari JKKK dikena beripai komuniti menua.
Iya mega madah ke pemesai guna kerejasama rat entara peranak enggau agensi bejalaika pengawa nentuka projek lanchar.
“Kaul regas bala komuniti beguna endar ngambi tetiap projek RTP ulih digaga lalu merik pemaik ngagai peranak, seriris enggau juluk pemansang menua pesisir dipejalaika Perintah Sarawak,” ku iya. -EDISI UKAS
