Pantai Damai Diangkat Nyadi Hab Dagang Temuai Strategik Sarawak
KUCHING: Sitak Pantai Damai terus diangkat nyadi entara hab dagang temuai besai Sarawak nengah bemacham projek pemansang strategik ti meri perati ngagai pengawa nambah fasiliti, pelajar enggau perengkaguna dagang temuai.
Sapit Menteri ba Opis Premier Sarawak (Penyeraris Projek ungkup Agensi Pemansang Kandang Menua, DBKU enggau Pekara Islam), Datuk Dr. Abdul Rahman Junaidi madah, pemansang sitak nya udah dilanggur lebuh dua puluh taun ke udah lalu diatu datai ba renggat bejalaika pengawa.
Iya madah, entara penyungkak baru pemansang iya nya projek nangkatka ICATS University College nyadi universiti penuh digaga di Kampung Terombol, urung 2 kilometer ari Telaga Air.
“Projek udah berengkah lalu disadang tembu dua ngagai tiga taun ba sitak pemesai 200 ikar.
“Pemansang tu ukai semina negapka sektor pelajar aja, tang ngeranchakka sektor dagang temuai tumbuh ba sitak nya,” ku iya.
Iya nyebut pekara nya ba aum media lebuh Pengerami Hari Raya Aidilfitri di Hotel Waterfront ditu, Hari Tiga.
Kaban Kunsil Nengeri (ADUN) Pantai Damai nya madah, sitak kandang tebing tasik baka Telaga Air, Kampung Sibu Laut enggau Kampung Sungai Aur bela dikemansang nyadi zon ekodagang temuai nengah inisiatif “Southern Belt of Tourism in Sarawak”, ti diatu majak matak penatai pengusung kelebih agi ujung minggu.
Seriris enggau nya, perintah nengeri mega merambu ngaga dua jalai besai baru dikena nyambung ari Jalai Besai Pehin Sri Adenan dikena nambah akses ke sitak nya.
“Siti ari jalai ti deka nyambung Kampung Telaga Air lalu digaga nyadi jalai dua pejalai, seraya siti da jalai deka nyambung terus ngagai universiti di Kampung Terombol.
“Tuju projek tu nambahka sistem penyambung enggau penguna lantang mindah betengahka jalai nya,” terang iya.- EDISI UKAS
