Telaga Air Ulih Nyadi Palan Dagang Temuai Lumba Ai
KUCHING: Telaga Air diperati ulih nyadi palan baru ngatur regatta besai, lalu negapka agi penuduk nyadi palan dagang temuai lumba ai di Sarawak.
Perambu nya nerima sukung Opis Menteri Dagang Temuai, Industri Kreatif enggau Seni Pemerindang Sarawak berindik ari penyelai format lumba dikena dia.
Sapit Menteri ba Opis Premier Sarawak (Penyeraris Projek ungkup Agensi Pemansang Kandang Menua, DBKU enggau Pekara Islam), Datuk Dr. Abdul Rahman Junaidi madah, inisiatif nya udah dikerandau kandang dua taun ke udah dikena ngerembaika produk dagang temuai nengeri.
Ku iya, entara pematak besai iya nya ngatur achara “endurance regatta” ti keterubah diatur serimbai Pengerami Telaga Air.
“Achara nya ngaul perau 30 pengayuh ti bekayuh penyauh lima kilometer. Penyelai sungai di Telaga Air ti lurus nadai betiku ngasuh pekit lumba diatur ba siti jalai aja, lalu ngasuh nya nyadi achara ti nyelai enggau narit ati,” ku iya lebuh dirandau media ditu, Hari Tiga.
Iya nerang, format lumba ti ngena awak urung 10 ngagai 11 minit nya mega narit ati raban opis menteri nyadi produk dagang temuai lumba ti ulih dikerembai.
Iya mega madah, perambu nya mungkur ngatur regatta di Telaga Air begintir taun enggau Pengerami Telaga Air dikena ngerichah kalinda dagang temuai ba nengeri tu.
“Tuju kitai ukai nyilih Regatta Sarawak ti tetap di Sungai Sarawak, tang dikena ngenapka achara regatta ke bisi ba nengeri tu,” ku iya.
Iya madah inisiatif nya dikeandal ulih nyadi pematak ke Telaga Air nyadi pematak dagang temuai, kelimpah meransang ekonomi komuniti menua tumbuh.-EDISI UKAS
