Sarawak Besikap Napi Musin Kemarau, JPBNS Chakah Matau
KUCHING: Komiti Penyangga Penusah Nengeri Sarawak (JPBNS) nerite atur besikap ba selampur nengeri berindik ari Musin Landas disadang abis kena 29 Mac tu, lalu nya kelai musin kemarau datai.
Sapit Premier Sarawak, Datuk Amar Douglas Uggah Embas madah, ubah musin nya ulih ngasuh penusah kampung angus enggau bekal ai tejanggal nyadi, kelebih agi ba endur ti dituntung kemarau panjai.
Iya ti mega Chairman JPBNS nerang, ari utai ti kala nyadi ngayanka penusah angus kala nuntung sekeda endur nyengkaum Kuala Baram maya hari kelalu angat.
“Ba gaya hari angat, penusah angus sigi ulih nyadi. Nya alai, semua raban patut bejaga enggau ngadang belama dikena nyeliah penusah dikeenggai nyadi,” ku iya.
Iya nyebut pekara nya lebuh dirandau media maya ngulu Pengerami Hari Raya Aidilfitri diatur Sapit Menteri ba Opis Premier Sarawak (Penyeraris Projek ungkup Agensi Pemansang Kandang Menua, DBKU enggau Pekara Islam), Datuk Dr. Abdul Rahman Junaidi ditu, Hari Tiga.
Berindik ari nya, iya nerang, JPBNS deka ngatur aum enda lama da dikena nyeraris atur besikap ba renggat bagi menua enggau pelilih ngambi pengawa ngesah ulih diatur berurun enggau lengkas.
Iya mega nyemetak madah, pengawa matau belama ba endur tau angus beguna endar, kelebih agi tanah kerapa, ari nyidi tumpuk angat nyadi pengawa intervensi tumu sebedau penusah nyerarai.
“Entara pengawa ti dipejalai nyengkaum nentuka perengkaguna baka telaga tiub, tekat ai mit enggau sistem pam air seruran manah dikena napi sebarang penusah,” ku iya.
Berebak enggau nya, Opis Rampa Menua (JAS) Sarawak begulai enggau agensi bekaul deka terus chakah agi matau tumpuk angat ba selampur nengeri dikena nagang tumu.
JPBNS mega nangkan mensia mayuh enda nunu sengapa ti tau ngasuh penusah angus, kelebih agi maya hari angat enggau rangkai.
