KAPIT: Agenda pemansang menua pesisir ditegap ari ngelancharka Projek Perambu Program Transformasyen Menua Pesisir (RTP) 2026 di Nanga Pelagus ti nyadi penyungkak perengkaguna pemun enggau pengelantang peranak dia.
Inisiatif nya dibantai ba Pengawa Bejadi Projek RTP enggau Program Tuai Begulai Enggau Rayat ti diatur ba Rumah Annie Isop, Nanga Pelagus, Batang Rajang kena Hari Tiga.
Pengawa nya udah dipenyadi Menteri Kereja Raya Malaysia ti mega Kaban Parlimen Kapit, Dato Sri Alexander Nanta Linggi, sereta mega digulu Kaban Kunsil Nengeri (ADUN) Pelagus, Wilson Nyabong Ijang enggau ADUN Baleh, Nicholas Kudi Jantai sereta bala pemesai bukai.
Lebuh bejaku, iya madah ke RTP 2026 ba sitak nya ngaul projek ngaga parit ba ujung bilik Rumah Annie dikena nambah perengkaguna pemun sereta pengelantang peranak.
Kelimpah ari nya, iya bisi ngemendarka agih belanja RM30,000 dikena ngaga dapur Rumah Annie, sereta pemeri RM5,000 ngagai tetiap Komiti Pemansang enggau Pengelikun Genturung Pendiau (JKKK) rumah panjai sereta RM5,000 ngagai tetiap gerempung indu ti ngambi bagi ba program nya.
Iya mega merambu ngaga Klinik Nanga Pelagus ti diatu ba renggat randau begulai enggau raban sitak Kunsil Nengeri (DUN) dikena nambah akses servis pengerai ngagai peranak menua pesisir.
Seraya Wilson Nyabong Ijang ngemendarka RM12,000 ngagai JKKK Rumah Annie, RM5,000 ngagai Gerempung Indu sereta RM3,000 ngagai tetiap gerempung indu ti datai ba program nya.
Nicholas Kudi Jantai mega meri RM5,000 ngagai Gerempung Indu JKKK Rumah Annie nyadi peransang ngagai sida ngambi regas negap pemansang komuniti ba renggat baruh.
