LAWAS: Sitak Trusan diatu meri perati ngagai agenda pemansang infrastruktur nengah bemacham projek strategik dikena negap perengkaguna pemun, nambah pengelantang rayat sereta ngeranchak sosioekonomi menua tumbuh.
Sapit Premier Sarawak, Datuk Amar Haji Awang Tengah Ali Hasan madah, entara projek besai ti benung diberi perati iya nya renggat keterubah Sarawak-Sabah Link Road (SSLR) ti diatu udah 70 peratus tembu, sereta nyadi penyungkak ngagai rentayan penyambung enggau pemansang sitak Trusan dudi hari.
Kelimpah ari nya, iya madah ke pelin pemansang menua Trusan taun tu ngagihka RM47 juta, ti nyelinting infrastruktur besai, opis pelilih mit Trusan enggau ngaga masejit baru.
“Perengkaguna komersial baka Anjung Usahawan enggau Petros Station mega disedia, kelimpah ngangkatka sitak Trusan nyadi Wetland Park," ku uya lebuh ngabang ngagai rumah Sekretari Politik Premier Sarawak Awangku Jienal Abedin Dato Pengiran Jawa kena Hari Tiga.
Ari sukut pengawa berumah, renggat keterubah pelin pemansang deka nyendiaka 50 lot rumah ti dikerembai nyau deka 100 lot, nyengkaum genturung pendiau baru.
Berebak enggau nya, Kaban Kunsil Nengeri (ADUN) Bukit Sari nya madah ke Hari Raya nya peluang rayat begelumu, taja datai ari pupu bansa enggau pengarap.
“Aku ngarap ke semangat penyerakup, bebasa enggau bebatak asur terus diterenak ungkup pemansang Trusan ti lantang,” ku iya. -EDISI UKAS
