DEBAK: Kaban Parlimen Betong, Dato Dr Richard Rapu ngatur pejalai ke Palan Nabur Penerang Nasional (NADI) Kampung Tuie, Debak ngabas empu perengkaguna ti disedia enggau pejalai inisiatif pendigitalan ba menua pesisir.

Dato Dr Richard udah mendingka penerang ari Menijar Palan NADI Kampung Tuie Nur Shahida bekaul operasyen palan nya, nyengkaum nyendiaka perengkaguna internet, kelas belajar komputer enggau program latih dagang digital ti diatur nitih timpuh ungkup komuniti menua.

Ku iya, palan baka NADI ditumbuh beguna endar dikena mantu nambah literasi digital, kelebih agi ba nembiak enggau orang dagang mi tba menua pesisir.

“Palan baka tu beguna endar dikena ngedut takah digital entara mengeri enggau menua pesisir, sereta meri peluang ekonomi baru ngagai peranak,” ku iya lebuh dirandau pemberita ba pejalai nya, Hari Tiga.

Iya mega meransang peranak Kampung Tuie ngena manah perengkaguna ti disedia dikena nambah penemu enggau pengelandik ba bidang teknologi pemadah.

Dulu ari nya, iya enggau bala bukai udah ngabang Hari Raya Aidilfitri ke rumah Kaunselor Sufian Omar ba genturung pendiau ke sama. -EDISI UKAS