DARO: Perambu numbuh Raban Voluntia Bomba Komuniti diperati majak beguna dikena negap pengawa peranak besikap, kelebih agi ba kandang menua pesisir ti jauh sereta beguna awak ti lama dilawa maya ngesah penusah.

Sapit Menteri ba Opis Premier Sarawak (Pekara Korporat, Pemadah enggau UKAS) Datuk Abdullah Saidol madah, raban nya diperati beguna endar berindik ari penusah angus nuntung siti rumah Kampung Semop tumu pagi kemari.

Ku iya, komuniti menua ptaut disikap ngena penemu pemun sereta pengelandi mutar penusah angus ngambi sida ulih ngadu pengawa sebedau raban bomba datai.

“Peranak menua patut disikap penemu pemun enggau pengelandik napi penusah angus ngambi sida ulih ngadu pengawa ti patut enggau lengkas sebedau raban bomba datai,” ku iya lebuh dirandau ba endur penusah nyadi, Hari Empat.

Kaban Kunsil Nengeri (ADUN) Semop nya mega madah, inisiatif negap komuniti nengah pengawa numbuhka raban voluntia nya deka terus chakah dipejalai nentuka tikas pengelikun peranak seruran tejamin.

Iya mega merambu perengkaguna pemun baka pam ai, hos enggau tong ai disedia ba sekeda endur strategik ba genturung pendiau dikena ngadang tumu mutar penusah angus, kelebih agi ba menua ti mar dilawa kereban bomba.

Dulu ari nya, siti rumah bansa kayu di Jalai Kampung Masjid Lama Semop Hilir, Kampung Semop diripot angus lengis ba penusah ti nyadi pukul 4.39 pagi.

Raban bomba nerima kangau berumban ngesah penusah lalu datai dia pukul 5.03 pagi pengudah pejalai 23 kilometer penyauh.

Operasyen ngerara api berengkah dua minit udah nya lalu api mujur dipadam sebedau operasyen tembu pukul 6.50 pagi.

Tiga diri sebilik ulih lari ngidupka diri enggau nadai apa nama, seraya pengempu rumah nadai dia maya penusah ketegal gawa.

Taja pia, nadai penusah bebadi nyawa lalu pun penusah enggau penyampau pengerugi agi dipansik.

Ba pejalai nya, Datuk Abdullah mega meri penyinu ati ngagai sida ti tasah lalu nyua tulung nengah Kaunsil Pengintu Pengelantang Islam Pulau Bruit enggau Kaunsil Tuai Raban Bansa enggau Tuai Komuniti (KMKK) Pulau Bruit.

Entara bantu diberi nyengkaum pemakai enggau kereban penindik asil kerejasama Opis Pengintu Pengelantang Mensia Mayuh Pelilih Daro enggau Opis Pelilih Daro.

Sama datai, Tuai Balai Bomba Daro Hasman Bakar, Tuai Polis IPD Matu Daro DSP Rahim Mihos, Pegawai Tadbir Opis Pelilih Daro, Pegawai Pengelantang Pelilih Daro, KMKK, kaunselor, pengari Kaunsil KMKK Pulau Bruit sereta pengari Kaunsil Amanah Pengelantang Islam Pulau Bruit.-EDISI UKAS