Tanah Kunchi Ekonomi Rayat Entap, 280 Nerima Pala Tanah Saratok
SARATOK: Rayat patut berunding tanah nya reta timpuh panjai ti ulih dikereja dikena ngulihka penatai pemisi enggau nentuka pemakai seruran chukup.
Jaku nya dipansutka Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom ba pengawa nyua Surat Pala Tanah Seksyen 18 Kanun Tanah Negeri (KTN) ba Balai Mayuhguna Ladang Sawit Roban Selatan, SALCRA, kena Hari Tiga.
Ku iya, ngempu tanah ukai semina hak aja, tang aset strategik ti ulih nyamin ekonomi ruang bilik entap sereta nyukung agenda nyamin bekal pemakai nengeri, kelebih agi maya betapi enggau pemar global ti enda tentu.
Ba penagwa nya, 280 penerima ari 105 rumah panjai nerima Surat Pala Tanah ngaul 373 lot enggau semua 626 hektar pemesai.
Pengawa nya dipenyadika Dato Sri Dr Stephen Rundi Utom sereta digulu 500 iku.
Sama datai Sapit Menteri Industri Pemakai, Komoditi enggau Pemansang Kandang Menua Sarawak, Datuk Maclaine @ Martin Ben, Penyading Penemu ba Opis Premier Sarawak Tan Sri William Mawan Ikom, Kaban Parlimen Betong Dato Dr Richard Rapu @ Aman Anak Begri, Senator Pele Peter Tinggom, Kaban Kunsil Nengeri (ADUN) Kabong Dato Mohd Chee Kadir, ADUN Krian Friday Belik, ADUN Kalaka Mohamad Duri sereta Menijar Besai SALCRA Dato Joseph Blandoi.
Iya madah baru, rayat enda patut irau lenyau tanah, tang patut pintar rundingg ngatur enggau ngena manah tanah nya nyadi pemansut ekonomi ti produktif.
Ku iya, SALCRA mujur nyerah urung 96 peratus tanah ngagai pengempu asal, seraya ke bukai agi diputar.
Iya mega madah, chara betanam betupi moden beraban patut chakah agi dipejalai ti meri perati ngagai kualiti asil kelimpah minta servis sanding penemu teknikal dikena nambahka produktiviti.
Berebak enggau nya, iya nerang ke dunya kemaya hari napi mayuh pemar enggau penyarut, nya alai bisi tanah meri pengelebih ngagai rayat bisi pemakai kediri lalu nya ngasuh sida enda kelalu bepanggai ba bekal ari menua luar.
Ngenang pekara sama, sehari nya mega ngemata pengawa ngelanchar (soft launching) logo genap taun ke-50 SALCRA serimbai ngintu Jubli Emas agensi nya, kelai penyulut lima puluh taun ba pemansang tanah menua pesisir di Sarawak.
Pengawa nya mega mandangka Perintah Sarawak seruran negap pengawa ngempu tanah sereta nyungkak pemansang ekonomi menua pesisir ti inklusif enggau meruan. -EDISI UKAS
