LINGGA: Inisiatif negap bala tuai renggat baruh nengah atur gawa ti berurun terus nyadi penyungkak pemansang komuniti menua pesisir lebuh Komiti Pemansang enggau Pengelikun Genturung Pendiau (JKKK) ditegap enggau pemereti ati sereta mandat ti nyata.
Pekara nya dipansutka ba Pengawa Nangguh Kus Program Atur Gawa JKKK Kampung Kerepok Ili ti dipenyadika ADUN Bukit Begunan, Datuk Mong Dagang kena Hari Empat.
Sehari nya mega bisi diatur pengawa nyua surat nampung baru pengawa Tuai Raban Bansa enggau Tuai Komuniti (KMKK) menua Banting, Lingga dikena negapka pengawa nyadi tuai ba renggat baruh.
Lebuh bejaku ba mua mayuh, iya nyemetak madah ke pengandal dilempai ba JKKK nya tanggungpengawa besai nentuka pengelantang komuniti sereta ngerumban agenda pemansang.
Ku iya, atur gawa ti tegap ulih nambah penyikar bejalaika polisi perintah ti efektif enggau besai agi empas ngagai rayat.
Iya mega nerang, pengawa nyukat tanah ngena Seksyen 6 nya pengawa ti nentuka sapa pengempu tanah, lalu nambah rega tanah sereta ngurangka petalat.
