KUCHING: Sarawak majak negap penuduk nengeri tu nyadi hab dagang temuai serantau nengah pengawa ngatur Aum Malin Temuai Asia Tenggara Ketiga 2026 kena 13 nyentuk 15 Oktober ila di Hotel Kingwood, Sibu.
Aum nya disadang ngempuru urung 1,000 deligit ari selampur Asia Tenggara kelimpah nyadi pelasar strategik negap standard profesional malin temuai sereta nyungkak pemansang industri dagang temuai bisi kualiti tinggi di rantau ASEAN.
Program nya diatur Gerempung Malin Temuai Sarawak nengah kerejasama Kaunsil Malin Temuai Malaysia sereta disukung Business Events Sarawak (BESarawak).
Edisyen sekali tu diatur berindik ari pemujur aum keterubah di Kuching ba taun 2024 lalu nya diatur serimbai aspirasyen Taun Nemuai Ke Malaysia 2026.
Nya mega nyadi pelasar mutar pemar industri sereta negap rentayan kerejasama ba raban pemekuh sektor dagang temuai.
Ba baruh Strategi Pemansang Pengudah COVID-19 (PCDS) 2030, Sarawak nyelinting penatai temuai nambah 7.5 peratus setaun manggai 2030 sereta berati ke kenang nemuai ti bisi kualiti enggau meruan.
Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan madah, Sarawak nyelinting penatai lima juta temuai ungkup taun tu tang kenang nemuai bisi kualiti tetap dikemerat.
Iya madah, dikena nentuka pemansang sektor dagang temuai meruan, raban malin temuai patut diberi sukung penuh, disikap ngena pengelandik nemban sereta besikap napi pemar ba sektor tu dudi hari.
“Keterubah, nengah sukung BESarawak, kitai ngemansang pengulih malin temuai nengah pengawa ngatur aum baka tu nyadi pelasar dikena belajar, nanggam kerejasama enggau besilih buah runding ba renggat serantau.
“Kedua, kitai bela meri agih belanja dikena matih malin temuai baru nyengkaum malin temuai khas kandang menua berejister sereta malin taman Sarawak kelimpah negap rentayan penau ba industri tu,” ku iya ba aum pemberita ditu, Hari Lima.
Iya madah baru, inisiatif strategik nya mandang pelasar Sarawak bepuguka legasi ngatur aum ti ngemerat empas timpuh panjai ngagai pemansang industri dagang temuai nengeri.
Iya mega madah, pengawa milih Sibu nyadi palan ngatur aum nya mandang inisiatif ngerembai pemansang dagang temuai ti inklusif kelimpah nyadung pemaik ekonomi ke selampur nengeri.
“Laban ti nyadi sebagi ari aktiviti ba program tu, bala diligit deka ngambi bagi ba program belajar luar nyengkaum besilih budaya ti meri peneleba terus ngagai dagang temuai komuniti.
“Inisiatif tu dikena nambah pemereti ati malin temuai lokal enggau antarabansa ngagai pangku pengawa sida nyaga identiti budaya sereta meri peneleba autentik ngagai temuai,” tampung iya baru.
Aum nya disadang nyadi penyungkak ngagai pemansang penau, nambah profesionalisma sereta negap penuduk Sarawak nyadi hab program dagang besai empas di Malaysia enggau rantau Borneo. – EDISI UKAS
