KUCHING: Program ngintu Earth Hour 2026 majak dikena nyadi pelasar nambah penemu pasal pemeruan lebuh Kaunsil Mengeri Kuching Selatan (MBKS) chakah ngatur pengawa bekelimat ngena kuasa enggau ngintu rampa menua enggau Kaunsil Pelilih Sri Aman ti nyadi tuai pengaw taun tu.

Datuk Bandar Kuching Selatan, Dato Wee Hong Seng madah, inisiatif global nya nyadi nalan besai meransang mensia mayuh regas ngemeran gaya idup ti meruan agi.

Ku iya, Earth Hour ukai semina simbolik madamka lampu aja, tang dikena nambah penemu enggau ngubah ulah mensia mayuh.

“Earth Hour ukai semina madamka lampu aja, tang nambah penemu ke alai pengawa mit ti dikereja begulai ulih meri empas ti besai,” ku iya ba aum media, Hari Lima.

Kelai nyukung pengawa nya, MBKS deka madamka lampu ba opis kaunsil, perengkaguna mensia mayuh sereta sekeda endur ti ditapat pengelama sejam berengkah ari 8.30 malam nyentuk 9.30 malam, senutuk enggau jam program renggat global.

Berebak enggau nya, sektor hotel, palan besai bebelika barang, institut pelajar enggau organisasyen korporat ti ngambi bagi mega diperati mandangka sukung tegut ngagai agenda pemeruna.

Iya madah, bemacham sektor regas ngaul diri nunjukka pengawa ngintu rampa menua begunaka kerejasama rat entara perintah, sektor peribit enggau komuniti.

Berindik ari nya, mensia mayuh diperansang sama madamka lampu pengelama sejams sereta ngelimat kuasa kelai sebagi ari gaya idup besehari-sehari.

Sama datai, Sapit Datuk Bandar, Dato Dr Zaiedi Suhaili, Kr Eric Tay Tze Kok, Kr Jong Jia Chee, Kr Kiing Sie Ying sereta Kr Misiah Abdullah.-EDISI UKAS

Pemberita: Lonney Jinab