KUCHING: Tiny Fest Borneo 2026 nyadi pelasar beguna negap pemansang nembiak mit sereta ngerapit kaul komuniti nuju mengeri ti inklusif agi enggau ngelantang ruang bilik.
Datuk Bandar Majlis Bandaraya Kuching Selatan (MBKS), Dato Wee Hong Seng madah, inisiatif baka nya mandangka komitmen nempa mengeri ti ukai semina maju ari sukut fizikal aja, tang mega ngemerat pengelantang komuniti, kelebih agi rebak biak.
Ku iya, pemujur siti-siti mengeri ukai semina disukat nengah pemansang infrastruktur aja, tang mega ari sukut peneguh komuniti enggau pengelantang rayat nyadi pemun nentuka pemansang ti bendar.
“Pengelama betaun, ba MBKS, kami udah bebendar gawa chara konsisten nempa ukai semina siti mengeri ti beresi, gadung enggau maju, tang mega siti mengeri ti siru, inklusif enggau ngemerat renggat baruh kelebih agi komuniti.
“Siti mengeri ke alai ruang bilik berasai likun enggau disukung, orang berimbai pendiau ti ngasai ke diri semampai bekaul enggau nembiak mit diberi peluang, pengandal enggau peransang ngambi ulih majak mansang,” ku iya.
Iya madah munyi nya lebuh ngari ke Sapit Premier Sarawak, Datuk Amar Profesor Dr. Sim Kui Hian bejadi Tiny Fest Borneo 2026 di Tropic City, Tabuan Dayak, Hari Enam.
Dato Wee mega madah, kerejasama Kuching ba inisiatif Turu Nembiak Mit Serakup Bansa Beserakup (UNICEF) Mengeri Ngelantang Nembiak Mit (Child Friendly Cities Initiative – CFCI) nunjukka inisiatif meruan nentuka peminta enggau sada nembiak mit diberi perati ba perambu mengeri enggau pemansang komuniti.
Berebak enggau nya, ku iya, Tiny Fest Borneo 2026 dipeda nyadi inisiatif betampung nyendia palan interaktif ti meransang pemansang fizikal, pengasai ati enggau pekara rama nembiak mit.
Iya mega nyebut pemar jeman digital kemaya hari ke alai nembiak mit majak nemu bekenaka teknologi ngelui ari pematut nyentuk ngachau interaksyen rama sereta pengelantang pengasai ati, lalu ngemerat pemesai guna nyendia endur ti ulih meransang interaksyen, kreativiti enggau ngasai kediri dikeibuh.
Tiny Fest Borneo 2026 ti diatur pengelama dua hari belabuh sehari tu ngatur mayuh aktiviti narit ati, program pelajar sereta aktiviti komuniti ti meri perati ngagai pemansang nembiak mit enggau negap kaul institusyen ruang bilik.
Bela datai, Chairman Pengatur Borneo Tiny Fest Kiyoshi Aihara enggau Direktor Eksekutif Regal International Group Nicholas Wong. - EDISI UKAS
