MIRI: Bisi 69 gerempung, organisasyen enggau gerempung pengasih ba Kunsil Nengeri (DUN) Senadin nerima geran Projek Mit Pemansang Menua Pesisir (MRP) sepenyampau RM805,500 dikena nyukung mayuh aktiviti sereta program komuniti dia.

Menteri Pengangkut Sarawak ti mega Kaban Kunsil Nengeri (ADUN) Senadin Dato Sri Lee Kim Shin madah, pengawa ngagihka geran nya inisiatif Perintah Sarawak nyaup organisasyen penerima ngatur program ninting taun sereta negap pengawa nambah kualiti idup komuniti.

“Geran tu dikearap ulih ngemujur mayuh program rama, ngintu pengelantang enggau komuniti ti meri pemaik besai ngagai mensia mayuh.

“Kitai deka organisasyen penerima ransing bejalaika pengawa ba pemansang kandang endur sida,” ku iya.

Iya madah munyi nya lebuh nyua geran nya ba sebengkah pengawa ti diatur ba Opis SUPP Pampang Senadin, Permyjaya, Hari Enam.

Dato Sri Lee mega madah, agih belanja nya belanja sesyen keterubah ungkup taun 2026 enggau tetiap organisasyen diperansang ngena geran nya enggau manah dikena nyapai tuju.

Iya nyemetak madah, agih belanja baka geran MRP nya pemeri Perintah Sarawak seriris enggau inisiatif perintah negap pemansang komuniti, nyengkaum ba sukut ngintu pengelantang rayat.

Nambah ke nya, iya madah ke pengawa bejalaika polisi pelajar pechuma ari Perintah Sarawak nyerangkung empat institusyen pelajar tinggi enggi nengeri iya nya Swinburne University of Technology Sarawak Campus, Curtin University Malaysia, University of Technology Sarawak sereta i-CATS University College.

“Pelajar pechuma tu nyendia peluang ngagai mayuh agi anak Sarawak dikena nampung pelajar enggau nadai tating belanja, seraya nempa modal mensia bekualiti ungkup pemansang nengeri,” ku iya. - EDISI UKAS