MIRI: Projek ngaga Klinik Pengerai Sepupok baru di Niah ti tejanggal berindik ari ungkus nambah deka ditinda baru bulan April tu, ku Kaban Parlimen Sibuti, Dato Lukanisman Awang Sauni.

Ku iya, projek Klinik Pengerai Bansa 3 ti dikemendar ba taun 2021 nengah ungkus asal RM40 juta nya sebedau tu ditaga belabuh dipejalai taun nyin tadi enggau timpuh pengelama 36 bulan.

Iya ti mega Sapit Menteri Luar Nengeri madah ke kereja tumu projek udah dipejalai pengelama dua taun lalu tinda keterubah digaga ba taun 2024.

“Projek tu udah dikemendar berapa taun nyin tadi lalu ungkus ti nambah enda ulih diseliah, kelebih agi ketegal rega kereban berumah niki pengudah pandemik COVID-19.

“Pia mega, raban Opis Kereja Raya (JKR) Sarawak mega nambah skop meresa seismek ngambi berati ke gaya struktur tanah sereta risiko dia,” ku iya.

Iya nerang, pengawa meresa seismek tu begunaka amat berindik ari sekeda penusah tanah enggau struktur ti tusur ti diripotka nyadi ba Sarawak nyengkaum penusah ba Long Lama sereta sekeda endur bukai adap utara nengeri.

Berebak enggau nya, JKR Sarawak minta pengawa meresa dipejalai nentuka struktur tanah engkeman enggau langkar tengkebang asal projek.

“Nyema tanah nya ditemu enda tegap, langkar tengkebang meseti ditegap nengah pengawa tambah seraya nambah ungkus projek.

“Tambah mega, pengawa meresa seismik nya empu begunaka besai belanja lalu nyadi entara kebuah belanja nambah,” ku iya nyemetak.

Berebak enggau nya, ku iya, pengawa meresa seismik nya diatu nyadi pekara beguna ba pengawa bejalaika projek pemansang ba Sarawak dikena nyeliah risiko struktur jai dudi hari, nyengkaum utai ti kala nyadi ba Klinik Pengerai Long Lama.

Nambah ke nya, projek nya udah dibantai baru ngagai Unit Perambu Ekonomi (EPU) ngambi ngulihka pemendar agih belanja tambah.

Pengudah pengawa tinda baru diputus, pengawa ngaga klinik nya disadang begunaka timpuh 36 bulan digaga.

Dikemendar nengah Langgur Pemansang Malaysia Lumpar Ke-12 (RMK-12) Rolling Plan 3, projek nya deka ngempuru Klinik Pengerai sereta Klinik Pengerai Indai enggau Anak (KIA) ba siti fasiliti begempuru, seraya nambah kualiti servis pengerai sereta pengelantang pesakit ba Niah enggau endur ngelingi nya. - EDISI UKAS