SPAOH: Pengawa ngagihka chek ari Perintah Sarawak terus negap pemansang komuniti menua nengah sukung ngagai mayuh organisasyen enggau peminta rayat ba Spaoh.

Sapit Premier Sarawak, Datuk Amar Douglas Uggah Embas madah, bantu nya mandangka pengeransing perintah nentuka pengelantang rayat sereta pemansang komuniti dipejalai chara inklusif.

Iya madah munyi nya lebuh bejadi pengawa nyua chek ti diatur ba Rumah Belelak Perintah, Spaoh, pagi tadi.

Ba pengawa nya, iya ti mega Menteri Pekara Wang enggau Ekonomi Baru sereta Menteri Infrastruktur enggau Pemansang Penyangkai Kapal Sarawak ti nyadi Kaban Kunsil Nengeri (ADUN) Bukit Saban udah nyua chek ngagai sekeda penerima ngaul serap komuniti.

Entara penerima iya nya Gerempung Tiong Hua Spaoh ti meri pemaik ngagai komuniti China di Pasar Spaoh enggau Kebun Spaoh, kelimpah Gerempung Indu China Spaoh sereta Spaoh Chinese Charitable Trust Board ungkup tuju nyeruri tepikong dia.

Bisi mega nerima chek iya nya Kelab Rekreasyen Opis Pelilih Mit Spaoh sereta Komiti Pemansang enggau Pengelikun Genturung Pendiau (JKKK) Kampung Penom ungkup tuju nyeruri rumah panjai.

Pengawa diatur Palan Servis DUN Bukit Saban nya mega digulu Sekretari Politik Premier Sarawak, Roseline Mapong, Injinia Unit Opis Kereja Raya (JKR) Betong, Jason Ng Boon Tuan sereta Pegawai Tadbir Khas Agensi Pemansang Bagi Menua Betong (BDDA), Abang Mohamed Abang Turkey.

Bela datai, Penguasa Tanah enggau Survei Bagi Menua Betong Moris Nayup, Sekretari Kaunsil Pelilih Betong Lister Clement Guwie, Pegawai Tadbir Menguasa Pelilih Mit Spaoh Denny Lim sereta Pemancha Komuniti China Pelilih Betong Goh Liang Tong. - EDISI UKAS