PAKAN: Peranak rumah panjai ditu dipinta semampai sedia napi sebarang penusah ngenyit nyengkaum penusah angus lalu meri perati ngagai sukut pengelikun, bekal ai enggau pemeresi.
Kaban Kunsil Nengeri (ADUN) Pakan, Tan Sri William Mawan Ikom madah, pengawa nagang penusah angus meseti diberi perati, kelebih agi ngaul perengkaguna pemun sereta tikas pengeleda entara peranak.
Ku iya, peranak meseti semampai berati ke risiko penusah angus enggau nentuka pengawa ba dapur dijaga manah sereta nitih ke atur ti patut dikena nyeliah penusah enda disadang nyadi.
“Pengawa bejaga bepun ari dapur enggau rumah. Kitai meseti ngatur rumah enggau manah sereta semampai nyaga ‘api dapur’ dikena nyeliah penusah enda disadang nyadi,” ku iya.
Iya madah munyi nya ba pengawa bejadi Projek Program Transfomasyen Menua Pesisir (RTP) ba Rumah Kanyan, Nyalak Ladong, Pakan, Hari Enam.
Ku iya agi, bekal ai ti chukup ba genap rumah panjai beguna amat ngambi besikap nyema penusah angus nyadi.
“Isu ai deka diputar lengkas laban nya beguna amat kelebih agi maya penusah ngenyit baka penusah angus,” ku iya.
Berebak enggau nya, iya mega bisi nyebut isu pemeresi, kelebih agi bekaul atur uras ba rumah panjai.
Ku iya, penanggul suntuk belanja ditapi raban bekuasa menua ngujungka pengawa nyendia taba muai uras ti sistematik agi napi pemar lalu nya kebuah peranak dipinta bejalaika inisiatif kediri.
Ba pekara tu, iya minta mensia mayuh nyendia lubang khas nyadi palan muai uras nengah bantu ari sida kelimpah nyeliah uras dibuai ke dalam sungai.
