SERIAN: Serakup Nasional Dayak Bidayuh (DBNA) nyata nyadi pelasar beguna ngempung raban bansa Bidayuh ba Sarawak kenyau ari ditumbuh ba taun 1955.
Penyanding Penemu (Pelajar) ba Opis Premier Sarawak, Datuk Amar Michael Manyin Jawong madah, slogan ‘Indi Awang Indi Asung Indi Bidayuh’ ti chukup tebilang ba komuniti Bidayuh meseti terus ditan nyadi lambang identiti enggau penyerakup.
Nambah ke nya, iya mega madah ke DBNA nya ukai siti parti politik, tang siti organisasyen ti nyaga pengelantang enggau pemansang komuniti Bidayuh.
Berebak enggau nya, iya ngelalau komuniti Bidayuh patut temegah enggau pangku pengawa ti disan DBNA sereta terus meri sukung rat ngagai serakup nya.
Ba lansa sama, iya merambu siti turu pelajar DBNA Serian ditumbuh dikena nyaup nembiak Bidayuh nampung pelajar ngagai palan pelajar tinggi perintah (IPTA) enggau peribit (IPTS) di Sarawak.
Sama datai, Kaban Kunsil Nengeri (ADUN) Bukit Semuja John Ilus, ADUN Tebedu Dr Simon Sinang Bada, Direktor Veterinar Sarawak Datu Adrian Susin Ambud enggau Chairman DBNA Serian Dr Chali Ungang. -EDISI UKAS
