KUCHING: Kuching City FC (KCFC) angkat lebuh ngalahka Hougang United FC 2-1 ba Stadium Nengeri malam Hari Enam lalu meri kelai positif sebedau ngelaban Selangor FC.

Dikemata lebih 1,500 penyukung, tim‘The Cats’angkat ba wisel keterubah lebuh nama ke gol ba minit keenam ari Jerome Mpacko asil disipak Ahmad Nawaf.

Taja pia, kelai positif nya tekeruga lebuh pengilap ba minit ke-33 lalu peluang nya dikena pemain Hougang United, Jaramillo Ayovi Washington Duglar ngujungka bulih 1-1, pemutus ti sama nyentuk abis first half.

KCFC nyau deka mansang ba mua sebedau belelak, tang Petrus Shitembi ti nguji semina kena ba sepiak kanan tiang gol.

Ba idar kedua, tuai rumah naka ulih bepadan enggau mujur nama ke gol ba minit ke-56.

Sipak pechuma Ahmad Nawaf dirampas Ronald Ngah Wanja dikena ngalahka penyaga gol, Muhammad Ridhuan Barudin.

Tuai jurulatih KCFC, Aidil Sharin Sahak, madah ke pekit nya dikena berati ke tikas pengeregas enggau penyikap pemain pengudah belelak Aidilfitri.

“Tu pekit ti manah dikena kami berati ke gaya pemain kelebih agi enggau tikas pengeregas pemain nasional.

“Tu mega peluang ngagai pemain bukai nunjukka penau enggau bepadan ngerebut penuduk,” ku iya maya dirandau pengudah pekit nya.

Ku iya, taja penyulut apin nyapai tikas pemadu manah, tang komitmen dipandang pemain nyengkaum pemain beganti meri pengandal ngagai tim nya.

Iya mega ngaku agi tubah sekeda sukut meseti dikemanah ungkup pekit bukai udah tu, ti mujur nambah dua gol lalu tu kelai positif.

Ba pekara sama, iya madah ke randau benung diatur begulai enggau pengatur kelab bekaul nyadi tuai jurulatih seraya madah ke niat deka terus ngangkatka KCFC ngagai tikas tinggi agi nyengkaum ba panggau Asia.

Udah tu, KCFC deka ngelaban Selangor FC kena 5 April tu ti disadang nyadi penentu penyulut tim. - EDISI UKAS