Industri Kerepek Pisang Ulih Nyadi Model Ekonomi Menua Pesisir
PADAWAN: Industri kerepek pisang bisi pengulih nyadi model ekonomi komuniti besai empas ti ulih dikerembai begulai dikena nambah penatai pemisi peranak menua pesisir.
Sapit Menteri Pengangkut Sarawak ti mega ADUN Mambong, Datuk Dr Jerip Susil madah, inisiatif woksyop di Skim Palan Pengentap Baru Tekat Ai Bengoh (BRS) nunjukka industri mit ulih mansang chara berurun enggau meruan.
Ku iya, program latih kenyau ari tiga taun ti udah nunjukka asil positif lebuh bala penyereta ulih ngasilka produk bekualiti enggau ngelaku produk nya chara konsisten.
“Taja pemansut diatu urung beratus piket sebulan, pengulih ekonomi nya besai enti dikemansang berurun enggau nemban,” ku iya ba pengawa nangguh woksyop nya, Hari Enam.
Pia mega, ku iya, bekal bahan mata meseti ditetapka nengah pengawa nanam pisang ba siti endur enggau ngena tanah puang sereta sukung teknikal Opis Betanam Betupi.
Nangkan nya, Pegawai Tadbir Menguasa Opis Pelilih Mit Padawan, Julius Scott Sapong madah, program nya mandangka pangku pengawa JKKK nyungkak pemansang komuniti.
Woksyop diatur Gerempung Pekara Indu Kampung Pain Bojong nya digulu 53 penyereta ari empat genturung pendiau lalu diembing 10 bala pengajar ari Kampung Punau. - EDISI UKAS
