MERADONG: Pengeran negap pemansang lumba ba renggat baruh terus ditegap lebuh Datuk Ding Kuong Hiing ngagihka Geran Khas Projek Mit Pemansang Menua Pesisir (MRP) ngagai Kelab Bola Tampar Meradong ba siti penemuai basa ba Palan Servis DUN Meradong, Hari Enam.

Agih belanja sepenyampau RM10,000 nya mandangka sukung meruan ngagai pemansang lumba bola tampar sereta negap kerejasama komuniti kelebih agi rebak biak ba Meradong.

Ba pengawa nya, raban kelab ti betuai ke Chairman iya, Dato Ung Sing Ung udah bekunsi pejalai sereta perambu aktiviti nyengkaum ngatur Pengerami Makai Lemai Ninting Taun 2025 nyadi pelasar ngenang jasa kaban enggau ngumpul belanja dikena nyukung program pemansang lumba.

Ku Datuk Ding, sukung ngagai aktiviti lumba beguna amat laban nya ukai semina meransang gaya idup bepengerai, tang mega nempa disiplin, semangat kerejasama sereta negut penyerakup entara komuniti.

Iya mega meransang mayuh agi program enggau pekit lumba diatur ba Meradong dikena ngansah penau baru ti ulih diangkat ngagai tikas tinggi agi.

Nambah ke nya, iya ngarap Kelab Bola Tampar Meradong deka terus aktif merambu sereta ngatur aktiviti ti meri empas positif ngagai pemansang lumba, kelimpah marit minat mayuh agi rebak biak ngambi bagi ba aktiviti bepengerai.

Penemuai basa nya tembu enggau pengawa begambar kelai kaul rat entara raban kelab enggau pengari rayat dikena ngemansang komuniti menua. - EDISI UKAS