BARIO: Pengawa ngingatka genap taun ke-81 Operasyen Semut ba Pelilih Mit Bario nyadi pelasar beguna ngenang jasa enggau pengelelak bujang berani suba, sambil negap semangat beserakup entara komuniti Sarawak.
Pengawa ti digulu urung 100 pengsuung nya diatur Rurum Kelabit Sarawak kena Hari Enam dikena ngingatka penyangkai payung terejun tim khas Z Force ba taun 1945, ti nyadi entara tusun dalam sejarah Perang Dunya Kedua di Borneo.
Sapit Menteri ba Opis Premier Sarawak (Pengereja Kasar, Imigresyen enggau Patau Projek) ti mega Kaban Kunsil Nengeri (ADUN) Mulu, Datuk Gerawat Gala madah, pengawa ngingatka nya meri awak ngenang pemerani sereta pengelelak sida ti ngambi nagi ba pengawa belaban enggau soldadu Jepun.
“Operasyen Semut dipejalai raban Unit Khas Z ti bejalaika misyen berani jauh ba ulu Borneo lalu bekerejasama rat enggau peranak asal Sarawak.
“Pengawa sida mandangka pemerani, pengeliat ati enggau semangat kerejasama maya napi pemar besai nya,” ku iya.
Iya nyemetak madah, sukung komuniti menua ti nyaup ari sukut nyaga, nerang ke endur sereta logistik nyadi kebuah besai pemujur operasyen nya.
Ku iya, jasa komuniti menua nya mengkang dikemegah nengeri lalu bukti nyata semangat beserakup sereta pemerani rayat Sarawak.
Nambah ke nya, iya minta kisah bujang berani enggau kerejasama ti ditanggam nengah Operasyen Semut terus dijaga sereta dikunsi ngagai rebak biak ngambi nyadi inspirasyen enggau lalau.
“Serimbai genap taun tu, beguna endar kitai terus nyaga enggau bekunsi kisah pemerani tu ngambi reti penaluk, peneguh enggau kerejasama ulih terus dipereti,” ku iya.
Bela datai, Sapit Menteri Dagang Temuai, Industri Kreatif enggau Seni Pemerindang ti mega ADUN Piasau, Datuk Sebastian Ting Chiew Yew, Presiden Rurum Kelabit Sarawak Dato Isaac Lugun, Tuai Besai Kelabit Pemancha Caleena Lallang, Penghulu Ken Paran Matu sereta pengari agensi enggau pegawai soldadu ari menua tu enggau menua luar.
Ke rikod, Operasyen Semut nya operasyen soldadu raban Berikat ti dipejalai tim khas Australia disebut Z Force ba taun 1945, enggau tuju ngumpul pengawa nyubuk, matih peranak menua enggau ngelanchar perang gerila dikena ngelaban soldadu Jepun ba ulu Sarawak.
Operasyen nya mujur ngelemi penuduk munsuh enggau ngujungka Borneo dilepas seraya mengkang nyadi lambang kerejasama rat entara soldadu Berikat enggau komuniti menua. - EDISI UKAS
