MIRI: Inisiatif negap pemansang modal mensia sereta pengerai ba Sarawak terus ditegap lebuh perambu numbuhka pampang kampus Fudan University di Miri diatu nyau deka dikemujur.

Sapit Premier Sarawak ti mega Menteri Pengerai Mensia Mayuh, Pengawa Berumah enggau Perintah Lokal, Datuk Amar Prof. Dr. Sim Kui Hian madah, Perintah Besai nengah Opis Menteri Pelajar Tinggi Malaysia udah madah ke nadai penanggul naggai perambu nya, seraya ngerandang jalai ngagai renggat ke bukai.

Ku iya, pekara nya asil surat ti dianjung bulan Ogos taun nyin tadi sebedau dipesetuju Kabinet Perintah Besai kena Disember 2025.

“Raban opis menteri deka terus meri malin ngenap atur peminta, lalu nya siti pengawa beguna dikena ngemujur projek tu,” ku iya.

Iya madah munyi nya lebuh dirandau pemberita pengudah ngulu Pengerami Sarawak Chinese Excellence Awards di Imperial Hotel, ditu Hari Enam.

Ngenang silik, iya madah ke randau nya diatur begulai enggau Direktor Institut Perubat Integratif Fudan University, Dong JingCheng ngambi nerang ke tunga kuing pengawa numbuh kampus nya.

Ku iya, pengudah bulih sukung Perintah Sarawak, Perintah Malaysia sereta raban universiti, atur bukai iya nya ngulihka pemendar ari Opis Menteri Pelajar Tinggi China.

Iya nyemetak madah, sida deka meri perati ngagai pengawa numbuh sekula perubat dulu sebedau mansang ngagai kampus universiti penuh, seriris enggau peminta begunaka mayuh lutur ba nengeri tu.

“Malaysia diatu suntuk urung 4,000 lutur. Ari 538 pegawai perubat ti nerima dianjung gawa empai lama, semina mimit aja disadang gawa ba Sarawak.

“Nya kebuah, pengawa numbuh sekula perubat tu beguna endar,” terang iya.

Ku iya baru, institusyen perubat Fudan nya entara ti tebilang ba China enggau urung 12,000 nembiak nyengkaum 8,000 ba renggat pascasiswazah, lalu bisi pengulih besai nempa pengereja profesional bekualiti tinggi.

Pia mega, pengawa numbuh sekula perubat nya ditaga dientudi pemansang hospital Fudan, ti ulih nambahka penau sistem ngenatai servis pengerai ba Sarawak.

Ba timpuh panjai, iya pechaya penatai universiti betikas dunya nya deka mai transfomasyen besai ngagai mengeri besai Miri nyengkaum penatai nembiak antarabansa nambah, pemansang ekonomi menua sereta pengulih nyendia penerebai terus.

Dulu ari nya, iya ngulu pengerami nya pengudah ngabas taba projek Kenyalang Smart City (KSC) muak ke lemai, ti mega entara projek pemansang besai di Miri. - EDISI UKAS