KUCHING: Maya dunya napi mayuh pemar, sektor dagang temuai Sarawak tetap tegap enggau peneguh dagang temuai domestik ti terus nyukung pemansang industri nya.

Menteri Dagang Temuai, Industri Kreatif enggau Seni Pemerindang Sarawak ti mega Menteri Nembiak, Lumba enggau Pemansang Orang Dagang Sarawak Dato Sri Abdul Karim Rahman Hamzah madah, peneleba ti udah nunjukka Sarawak bisi pemun dagang temuai domestik ti entap, lalu ulih nentuka industri terus mansang ba sebarang pekara ti nyadi.

“Kitai meda lebuh napi COVID-19 suba, taja pintu ditutup, bilun enda ulih tama tang industri dagang temuai ba Sarawak idup nengah pemisi program ti diatur kitai baka program Sia Sitok enggau ke bukai.

“Enda patut ga kitai deka diau dalam rumah aja, ti ari Miri, Sibu, Bintulu sida ulih datai ke Kuching enggau ari Kuching, Sri Aman sereta ke bukai ulih ke Miri, ke Sibu laban kitai mayuh produk dagang temuai,” ku iya.

Iya madah munyi nya lebuh dirandau pemberita ba Pengerami Aidilfitri kededua opis menteri nya ba siti hotel, ditu Hari Minggu.

Berebak enggau nya, Dato Sri Abdul Karim nerang pemansang ba renggat global diatu enda meri empas besai ngagai industri dagang temuai nengeri.

Ku iya, taja bisi kebuah baka ungkus bekaul niki ti engka meri empas ngagai pejalai, tang nya enda ngeruga semua sektor dagang temuai.

Iya madah baru, agi tubah peminta komuniti deka nemuai, seraya nentuka industri terus mansang enggau manah.

Kelimpah ari nya, iya meransang mensia mayuh neleba kediri enggau perambu raun lalu meri perati ngagai pengawa bejalai dalam nengeri nyadi pilih ti manah enggau ngelimat belanja. -EDISI UKAS