KUCHING: Polisi idar kuasa ti dilanggur Sarawak tumu agi sebedau penyadi penyarut kuasa dunya diatu bukti visyen jauh timpai ari tuai nengeri tu nyamin pengelikun enggau pemeruan pemansut kuasa.

Sapit Menteri Kuasa enggau Pemeruan Rampa Menua Sarawak, Datuk Dr Hazland Abang Hipni madah, penyarut geopolitik baka di Timur Tengah enggau di Ukraine udah ngerumban pengeleda global senentang pemesai guna kuasa altenatif lalu ngenuku penemban tunga kuing ti udah tumu agi dikemansang Sarawak.

“Enti kitai meda ari sukut polisi iya nya polisi idar kuasa, tu mih pemun tauka ‘turning point’ ungkup serata dunya berundingka nama kuasa altenatif ti patut diperati enggau dikemansang,” ku iya.

Iya madah munyi nya ba Pengerami Nerima Pengabang Hari Raya Aidilfitri 2026, ditu Hari Minggu.

Sarawak, ku iya, ba penuduk strategik ngemudi agenda nya berindik ari pengaya pengeraja asal ti dikembuan, nyengkaum pengulih besai ba kuasa hidro, solar sereta pemansang bahan api dudi hari baka hidrogen gadung enggau metanol.

Ba konteks besikap napi pengusut kuasa, iya nerang ke Sarawak mega bela ngasai pemar global.

Berindik ari nya, iya mega bekunsi polisi idar kuasa ti dipejalai berenggat, belabuh enggau inisiatif pandak entara 12 bulan nyentuk tiga taun ti meri perati ngagai atur ngena kuasa efisyen agi.

“Udah nya, renggat kedua ti diatur entara tiga nyentuk lima taun nya timpuh idar champur, ngaul pengawa ngena minyak enggau gas.

“Udah nya, baru idar besai ngagai kuasa gadung deka dikemujur. Nya kebuah, pengawa tu nyerangkung tiga renggat lalu disadang begunaka timpuh entara 10 nyentuk 15 taun,” terang iya baru. - EDISI UKAS