Musim Kemarau: Tumpuk Angat Ba Sibu, Mukah Begunaka Atur Mutar Lengkas
Musim Kemarau: Tumpuk Angat Ba Sibu, Mukah Begunaka Atur Mutar Lengkas
KUCHING: Sarawak diatu napi gaya hari angat ke alai sekeda endur udah dikelala nyadi tumpuk angat, lalu begunaka atur mutar lengkas dikena ngerara penusah angus sereta ngurang risiko api nyerarai ngagai endur besemak.
Sapit Premier Sarawak ti mega Chairman Komiti Penyangga Penusah Nengeri Sarawak (JPBNS) Datuk Amar Douglas Uggah Embas madah, naka diatu siti tumpuk angat dikelala ba Kemuyang, Sibu lalu siti da ba Penasu, Mukah.
Ku iya, penusah angus ba Sebuyau mujur dipadam, lalu siti da penusah angus mega diripot nyadi ba Bintulu.
“Pagi tu, raban bomba deka dianjung ngna helikopter bejalaika operasyen ‘water bombing’di Penasuk enggau ngagai Sibu.
"Operasyen ‘water bombing’ tu dipejalai ba tanah kerapa laban nya endur ti chukup mayuh pemar maya penusah babas angus nyadi.
“Kebuah pia laban enti kitai semina ulih meda sebun pansut, kebendar agi ulih nyerarai ngagai endur ti besai agi laban lebuh kitai meda api mau, nya nunjukka endur ti udah balat angus nya chukup besai.
“Nya kebuah, strategi kitai iya nya ngerara api enggau naka pengelengkas,” ku iya lebuh dirandau pemberita ba Pengerami Nerima Pengabang Aidilfitri Menteri Utiliti enggau Telekomunikasyen Sarawak Dato Sri Julaihi Narawi di rumah iya, ditu Hari Minggu.
Kelimpah isu penusah angus, Datuk Amar Douglas Uggah mega madah, sekeda endur ba Sarawak diatu nyau napi penanggul suntuk bekal ai kelebih agi ba kandang tebing tasik lalu disadang ulih nambah ngagai mayuh agi genturung ba menua ulu nyema musin kemarau majak nyadi ba timpuh berapa hari ke deka datai.
Ku iya, ripot tumu naka diatu udah diterima ari Betong, lalu sekeda endur mega dipatau rat dikena ngelala tikas empas suntuk ai irup ngagai peranak.
“Nya alai, raban Opis Pengintu Pengelantang Komuniti benung dianjung dikena nyaup mutar penanggul suntuk ai laban bisi sekeda endur nadai bekal ai irup ketegal musin kemarau.
“Naka diatu, bantu benung dianjung enggau perengkaguna bekaul mega benung disedia ngambi ulih nentuka semua penusah ti diasai ke rayat ulih diputar.
“Kitai mega ngarap semua unit enggau agensi deka terus begempung mutar penanggul tu dikena nyaup rayat,” terang iya.
Ku iya baru, Opis Bekal Ai Menua Pesisir (JBALB) deka nyaup bejalaika operasyen nganjung ai ngena lori tangki ngambi mai bekal ai ngagai endur ti napi penanggul nya.
Bela datai, Sapit Premier Sarawak Datuk Amar Prof Dr Sim Kui Hian, Speaker Kunsil Nengeri Sarawak Tan Sri Datuk Amar Mohamad Asfia Awang Nassar, dua Sapit Menteri Utiliti enggau Telekomunikasyen, Datuk Ibrahim Baki enggau Datuk Liwan Lagang, Sapit Menteri Di Opis Premier Sarawak (Penyeraris Projek Ungkup Agensi Pemansang Kandang Menua, DBKU enggau Pekara Islam) Datuk Dr Abdul Rahman Junaidi sereta temuai dipebasa bukai. - EDISI UKAS
