DARO: Gerempung Nembiak Menua Beserakup Sarawak (SABERKAS) mengkang megai tanggungpengawa besai ngatur program bekaul pemansang komuniti, lebih agi di menua pesisir.
Sekretari Besai SABERKAS Nengeri Sarawak ke mega Kaban Kunsil Nengeri (ADUN) Daro, Dr. Safiee Ahmad madah, program ke diatur bekaul pengintu pengelantang, pelajar enggau voluntia beguna bendar nyaup rayat.
"Pengeransing ke dipandang raban SABERKAS ba selampur menua ukai semina mandangka gerempung tu meruan relevan tang bela nyaup pemansang positif ba rayat mayuh," ku iya.
Iya bejaku munyi nya ba Pengerami Basa & Aidilfitri 2026 SABERKAS Pampang Daro ditu, empai lama.
Dr. Safiee ke mega Chairman SABERKAS Pampang Daro madah, pemujur ngatur macham program bepun ari kerejasama ke manah tiap iku raban gerempung nya.
Berebak enggau nya, iya ngelalu bala raban gerempung nya semampai ngemerat penyerakup pangan diri dikena nentuka program sida semampai datai ba tuju ungkup rayat.-EDISI UKAS
